الغزل المباح… أمي
خلوني الليلة امارس شوية من الغزل المباح واتغزل في امي.
امي جميلة وما بتكلم عن جمال الملامح وبس بتكلم عن جمال الروح عن الاصالة عن الحنية وعن الكرم السوداني البنعرفو زمان… الكرم البجي من القلب قبل الجيب.
امي بيتها مفتوح للناس ونارها دايما موقدة للضيف والضيف عندها ما ممكن يدخل ويطلع ساكت لازم يأكل ويشرب ويتكرم والا كانو الزيارة ما تمت!!!!
وأكتر حاجة بحبها فيها طريقتها وهي بتعزم الناس
«النبي يا إخواني تاكلوا… عليكم الله يا الحبان تاكلوا من دا… تدفنوني لو ما اكلتو »
وبعدها تلتفت لينا سريع
يا بت قومي أعملي العصير… جيبي الشاي.
ولو الضيف حاول يقوم
«والله ما بتمشوا إلا تاكلوا يا إخواني… عدم العروض جفا» امي ما تسيب مطبخها ابدا
والحكاية عندها ما اكل وشاي وكرم ضيافة وبس.
امي بتزور المريض وتقيف مع المحتاج و تدي المسكين وتواسي الزعلان وتسعى بين الناس بالخير… تدخل في مشاكل الأسر عشان تصلّح وتقرب البعيد وتصالح المتخاصمين و تدي النصيحة و تسمع همّ الناس و مشاكلهم بكل اهتمام … كم مرة رجعت خطيب و خطيبة و زوج و زوجة… وعشان كدا نحن بنسميها (قاضي الغرام)
هي من نوع النساء البشوفن مشكلة بين اتنين وما بقدرن يقولن ما شغلي.
شغلها الناس وهمّها الناس و الاهل وفرحتها إنو الناس يكونوا بخير.امي بالنسبة لي نموذج للمرأة السودانية الحنينة الكريمة الأصيلة المعطاءة… المرأة البتعتبر انو البيت البِلا ضيوف ناقص وانو اللقمة البتتقسم مع الناس أبرك و افضل وانو السؤال عن الغائب واجب وزيارة المريض اصل والوقوف مع المحتاج ما محتاج مناسبة. امي دمعتها تحت الرمش و بسماها فوق خشمها.
انا ممكن اكتب عن امي كتير… ومهما كتبت حاكون ظلمتها.
لأنها بالنسبة لي رمز لكل الجمال الشفتو في حياتي… ويمكن لكل الجمال اللسه ما شفتو.
ويمكن أجمل حاجة ورثتها منها ما حاجة بتنقاس ولا بتتشاف… هي الايمان بأن الإنسان قيمتو في الأثر البخليه في قلوب الناس.
واليوم انا ما كتبت الكلام دا عشان أمي بس كتبته عشان أفتح باب الغزل المباح في أمهاتنا… نحن مرات بنحب أمهاتنا حب كبير لكن بنختصر كل الحكاية في كلمة أمي حنينة.
طيب احكوا لينا عن الحنية دي…
عن جملة بتقولها أمك وما بنساها البيت عن عادة غريبة وجميلة فيها عن أكلتها، عن ضحكتها عن كرمها عن زعلها عن موقف كل ما تتذكرو تقول: دي أمي وما في زيها.
اتغزلوا في أمهاتكم وهنّ بينكم، واحكوا عنهن كما هنّ… بتفاصيلهن الصغيرة الجميلة.
وانا بدأت بأمي…هسع الدور عليكم
احكوا لي عن أمهاتكم… شنو اجمل حاجة في امك؟؟؟
وأما والدي عليه رحمة الله… فله حكاية اخرى وغزل آخر وحنين لا ينتهي.
مسافات…جدية عثمان