غادة عبد الرازق: أغلب البرامج استغلت صراحتي من أجل الترند.. وطلعوا عليا سمعة

أكدت الفنانة غادة عبد الرازق، حرصها خلال الفترة الحالية على انتقاء إجاباتها على أسئلة مقدمي البرامج التليفزيونية، موضحة أنهم استغلوا صراحتها بسبب رغبتهم في تصدر الترند.

وقالت غادة عبد الرازق، في تصريحات إذاعية: أغلب البرامج استغلت صراحتي وأنا للأسف ماكنتش واخدة بالي، لأن هو في مصلحته يجيب غادة عبد الرازق ويطلع بيها ترند وأنا متسرعة في الرد وصريحة جدًا وأتأذيت من ده، ودلوقتي بقيت باخد بالي جدًا لو روحت برنامج أي سؤال ميعجبنيش على الهواء بوقفه عند حده وبقول ده عدم احترافية.

وتابعت: الفانز بتوعي دمهم شربات ومعايا بقالهم سنين، أنا عندي ناس من 22 سنة وحافظين غادة عبد الرازق، وأنا اللي في قلبي على لساني، بس الحمد لله بقيت ماسكة لساني دلوقتي.

كما تحدثت غادة عبد الرازق، عن فترة غيابها عن الساحة الفنية، قائلة: شغلانتنا من زمان جدًا لما تلاقي حد ناجح أوي ومش عايز نجاحه يكمل، هو بينجح بالعناصر اللي حواليه مش لوحده، أنا مع مخرج وكاتب وكاست وحدوتة أنجح، فكانوا بيطلعوا عليا سمعة علشان يخوفوا مني المنتجين والمخرجين، وبيعملوا نفس الحكاية مع الممثلين إني بتدخل، الأعمال اللي اشتغلتها أثبتت إن اللي بيقولوه مش حقيقة، لغاية ما مصر كلها عرفت إن ده مش حقيقة، لكنه خد وقت وتعبني نفسيًا.

وعن واقع سنة 2023 عليها، فعلقت غادة عبد الرازق، قائلة: سنة 2023 كانت حلوة أخدت فيها خطوات كويسة على الصعيد المهني والشخصي، وكنت سعيدة بـ تلت التلاتة وحدث بالفعل، وإني عملت فيلم هو لسة منزلش ولكن رجعت من خلاله للكوميدي، وعلى المستوى الشخصي عنيا فتحت على حاجات كتير أوي أن أحفادي كبروا، فبقيت حاسة إن في أشخاص كبار موجودين معايا وبياخدوا ويدوا معايا في الكلام مكنتش واخدة بالي، إدتهم وقت من حياتي هما وبنتي روتانا وعملت حاجات عمري ما كنت أتخيل إني أعملها في الفاشون.

القاهرة 24