عماد رشاد يكشف سر استمرار زواجه 40 سنة: بعملها حاجات المخطوبين مش بيعملوها لبعض!!

تحدث الفنان عماد رشاد، عن علاقته بزوجته الفنانة المعتزلة راوية صالح، وكيف حافظ على زواجه أكثر من 40 عامًا، مؤكدًا أنه طيلة تلك السنوات كان حريصًا على إسعاد زوجته خاصة أنه رومانسي بطبعه.

وقال عماد رشاد خلال لقائه مع القاهرة 24: كنت في عز شبابي ومعروف وحوليا جميلات، ولكني تعلمت من والدي أن اختياراتي مسؤوليتي، وكان يقول لي دايمًا: هتختار حد هتتجوزه مش معنى أنك مش مرتاح تقول له امشي لأن الطرف التاني مالوش ذنب، وربنا وفقني بزمليتي في المعهد قامت بينا مشاكل وعواصف ولكن كان أبويا في دماغي، وجملته: اختيارك مسؤوليتك تتحمله وبعالج دائمًا في بالي، وده الطبيعي والحياة الزوجية فيها مشاكل ولكن المهم هو القدرة على احتواء المشاكل وحلها.

وأضاف عماد رشاد: يمكن بين كل أصدقائي ودفعتي أنا الوحيد اللي كمل مع زوجة واحدة، وده شيء سعيد به جدا والحمد لله شفت أحفادي وأنا صغير لأني اتجوزت وأنا 22 سنة وكان عندي بنت وأنا شاب صغير ومستمتع بأحفادي وحفيدي عنده 21 سنة، ولو كنت اتجوزت في الظروف الصح وسني متأخر ما كنتش شفته.

وتابع عماد رشاد: كنت حريص وملتزم أني أنجح البيت ولو أي مشكلة هتقرب من باب البيت أقطعها، والأهم بالنسبة لي أن مفيش حاجة تهز بيتي ودي كانت سياستي وكانت فكرة حلوة لأن الأسرة شيء حلو وجميل زي الوطن بتكوني حاسة بالانتماء له ما تعرفيش ليه وازاي.

وعن سر حفاظه على زواجه 40 سنة قال رشاد: بشغل دماغي وخيالي، وأنا طبيعتي رومانسي جدا، ولو شفت شوط مؤثر اتأثر اوي ولو سمعت أغنية فيها حساسية اتاثر جدا وده سهل يخلق مود حلو في الحياة، وبعمل مع مراتي على مدار 40 سنة حاجات ما يعملهاش المخطوبين مع بعض لحد الآن، ممكن في يوم أولع شموع وقاعدة شيك وأجيب الناس اللي بتحبهم من أخواتها وأصاحبها واعملها قاعدة لذيذة.

وأكمل: في وسط الناس بعاملها أنها ملكة المكان وهي بشر بتتأثر فبيخليها لما تنفعل تقول ده عمل معايا كذا وكذا فتهدى، وأنا بحب اللحظات اللي أقدم فيها حاجة حلوة للناس اللي بحبها، حتى لو أكلة حلوة  وبكون سعيد جدا خاصة مع الست اللي تعبت معايا وكملت فبفاجئها كتير جدًا.

القاهرة 24