صبري محمد علي (العيكورة) يكتب: أولاد (………….)
تعرف يا عب باسط …!
ما فى حاجة مكيفاني الايامات دي غير (اللولوه) بتاعت عمنا البرهان دي .
ياخ الزول ده والله جنس غتاتة عليهو لكن ..!
القحاتة ؟
نعم سعادتك
اسمعوا …
نحن مع الاطاري وسندعمه
طيب يا سعادتك ياخ مااا خلاس هاك حكومتنا .
سمح …
كدي جيبوها النشوفا
بعد يقلب الورق كداااا
القحاتة
نعم سعادتك
امشوا وسعوها شوية الحكاية دى كده ما بتمشي
حاضر سعادتك
(بعد اسبوعين تلاتة)
والجماعة شغالين ورش وفولكر زي ام العروس يتهامسوا
شكلوها بما يريدون
تاااني يرسلوا عاوزين نقابل الرئيس .
طيب قال ليكم ادخلوا
وكلو واحد يدفر فى التاني يتراجفوا
وبلع ريق وتأتأة ….
ومادين الملف
سعادتك خلاس انتهينا
سمح جيبوها …
يقلبها
الكلمة دي شنو؟
دى (توافقنا) سعادتك
طيب الفاء دي فيها نقطة زايدة
اااي خطأ مطبعي سعادتك
سمح امشوا صلحوها وتعالوا بعد تلاتة اسابيع
ياخ والله الزول ده نرفع ليهو القبعة على الحركات المفعمة بالوطنية بتاعتو دي
اول امبارح ….
جابو معاهم (حميدتي) نظام نحنا بي حقنا
لكن (بوبو) هد المعبد (فااا) قال ليهم الجيش والامن والشرطة ؟
ده شنو؟
اصلاح سعادتك واعادة هيكلة
اخد ليهو صننة ومد الورق للياور بتاعو وقال ليهم
(الا لحكومة منتخبة)
تممممم المطرة صبت
رئيسنا عسل
والله عسل
يا اخونا عسل
حميدتي نقل عنه وهو يفرع اصابعه معاتباً القحاتة يا جماعة الكلام ده بقدموه داخل الغرف المظلمة ! (احييي ياركبي)
قبل ما انسى : –
القحاطة شلتوا النقطة الزايدة فى الفاء واللا لسه
صحيفة الانتباهة