بابكر سلك يكتب: إنكشحت شوووو
*نحنا لما نقطت نقطة نقطة زعلنا دايرين نطق.
*،وأنتوا تضحكوا.
*تجوا تنكشحوا مرة واحدة شوووو؟.
*في لحظة كانت كورتنا درون وكورة الجماعة درون.
*قلت سبحان الله نحنا راجيين الله والجماعة ديك راجيين الحكم.
*ربك رب الخير أنا في كلامي داك وراهم ليك الحكم منو .
*التاني.
*الجماعة خلوا الحكم بقوا راجيين البلنت.
*والجزولي ممبابي ربنا وفقو.
*والكورتين مشن على كده.
*كشحتين تاني زي الكشحة دي .
*وتكمل الحدوتة .
*والله في حكام كده زي غطاء فتيل الدواء.
*حموها تنكشح نهائي.
*لو ماقلووز الحكام ده .
*كان تكون دي الكشحة الرابعة.
*والكشحات الجايات أكتر من الرايحات.
*المهم في الموضوع تظل بطولة الدوري بدون هزيمة أو تعادل حكراً على الزعيم حتى أشعار دوري آخر .
*ده لقب صعب مابقدر عليهو أي زول.
*وأهلينا أرجنتينا.
*وبمناسبة الأرجنتين دي .
*هبوط طائرة المنتخب الأرجنتيني على أرض مطارهم ذكرتكم شنو؟؟.
*أنا غايتو ذكرتني مانديلا.
*ناس محمد عبدالماجد ديل ماذكرتهم شي.
*لأنهم مابعرفوا درب المطار.
*والمطار بي وين؟.
*وإن كانت صورة ميسي على(ضنب) الطيارة ظاااهرة .
*فأننا لم نضع صورة بريمة على ضنب طيارة مانديلا .
*لأنو المريخ مافريق الرجل الواحد.
*ده فريق النجوم .
*لذا أكتفينا بعلم المريخ وعلم السودان يرفرفان عبر كابينة القيادة يوم مانديلا .
*يوم زي ده ناس خالد عزالدين لاشافوهوا ولا حلموا بيهو.
*شكراً ميسي عشان ذكرتنا مانديلا.
*الزول من يشوف المطار ويتحرق شوقاً له أعرفوا مريخابي.
*والزول من يشوف المطار ويقعد ماناقش شي.
*أعرفو.
*أعرفو.
*أعرفو مامريخابي.
*باقي الجماعة ديل اليومين دي متصلحين معانا .
*برغم أنو الموضوع بي حقنا وكده يعني.
*لكن حسن التعاون ذاتو كويس.
*مستأجرين مفروش.
*بي مقصورة كردنة الكان بقعد فيها براهو .
*إن شاء الله نقعد فيها لب.
*نحنا مستأجرين وحرين.
*مستأجرين مفروش.
*بي غرفة المخدرات والبلكونات وموية الصحة والرتينزات وأي حمير مدفونات.
*كلو مستأجرينو.
*وإحتراماً للأهلة.
*سنتأهل من استادهم.
*الجوهرة .
*الشيخة.
*الشيخة شيخة السودان.
*أيها الناس.
*إن تنصروا الله ينصركم .
*أها.
*نجي لي شمارات والي الخرتوم.
*كان شفت يا والينا.
*القينان البجوا مع القونات عصروا علينا.
*مافي مبيد يا والينا؟؟؟؟.
سلك كهربا
ننساك كيف والكلب قال أحلى القون البجي مع القونة ويلقط النقطة ولا القون التاني الجابو مبابي في الأرجنتين واخد نطة؟.
وإلى لقاء.
سلك
صحيفة الانتباهة