بابكر سلك يكتب: تصووور روعة المشهد

*روعة المشهد كانت في إفتتاح مونديال قطر.
*مهما حكوا ليك .
*ولو شفت بعينك.
*ولو شاهدت الحدث من شرفة الشيخة موزة .
*مابتقدر تتصوووور روعة المشهد.
*قطر كده.
*الجنة كيف؟ .
*جنة تجنن .
*إبداع في أي شيء.
*في التصميم .
*في التنفيذ.
*في التنسيق.
*في الخيال.
*في التصور.
*في الإخراج ده .
*إبداع.
*تتفرج في شنو؟.
*في السواري جمب الاستاد.
*ولافي الدفارات إياها البدقوا صاجة بالعصايات.
*ولا في قشر قصب السكر المخضبة بيهو أرضيات الاستادات .
*ولا في ستات الشاي وسط الجمهور على المدرجات.
*يشعلن النار.
*ثم يطفين لهيبها بجردل موية.
*ويكشحن الباقي.
*ياكلن قسمتهن ويتخارجن .
*حافظات جدول الدوري أكتر من اللجنة المنظمة.
*قطر ياخ .
*وآلله نحنا أبعد من هذا الزمان بآلاف السنوات الضوئية والصوتية والمرئية .
*نحن بالضبط بهناك للعصور الوسطى.
*ويا حليل المحطة الوسطى.
*أنا ذاتو ماعارف نحنا في الدنيا دي قاعدين لي شنو.
*كل الناس أدهشت العالم بإنجازات وطفرات.
*إلا نحنا.
*ما أدهشنا العالم إلا بسجمنا ورمادنا وقباحة مدننا .
*أدهشناهم بثرواتنا التي نملكها ونحن أفقر شعب.
*نحنا عالة على العالم.
*المهم.
*إتصل بي الاستاذ الصحفي محمد علي جار الله.
*مؤسس سودانايل.
*أول صحيفة الكترونية.
*إتصل بي والدهشة تلجمه من عمايل قطر.
*سألني .
*إتحادنا قدم طلب للإتحاد القطري عشان يدونا واحد من الاستادات دي ولا ماقدم؟.
*قلت ليهو إتحادنا هو عارف أنو مفروض يقدم؟.
*قال لي تونس قدمت ووافقوا ليها.
*نحنا مفروض نقدم سريع .
*قلت ليهو نحنا بنقدم المشاكل على كلو شيء.
*ناس إتحادنا ديل لو مشوا ساي هناك.
*البمبان بفرتق كاس العالم.
*قال لي إتواصلت مع زول واصل في قطر.
*قال رسلوا خطابكم للإتحاد القطري والباقي علي .
*قلت ليهو قول أدونا الاستاد .
*والله إلا يخلوهوا قبلو.
*لأنو لو شحنوهوا .
*صدقني مثلث برمودا ببلعو.
*زوووت كده.
*لاقطر تلم فيهو لانحنا نلم فيهو.
*وحتى كان وصلنا.
*بصلنا بدون نجيل.
*لاهجين ولاعجين .
*بصلنا نقعة زي رأسي ده.
*قال لي أنت أعمل العليك وكلمهم.
*قلت ليهو أكلم منو؟.
*هم تفتكر قاعدين؟.
*ديل بكونوا مدورين لقيمات في خور فكان.
*شاي لبن ياعمك.
*اللهم هل بلغت؟. ‬‏
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*والينا.
*استادات قطر دي كلها الطوفشن بينا.
*مافيهن استاد قصوا شريط إفتتاحو بي شاكوش زي استادا لينا.
*عرفت ليه هم متقدمين ياوالينا.
سلك كهربا
ننساك كيف والكلب قال قطر تشهي في الكوزنة.
وإلى لقاء.
سلك

صحيفة الانتباهة