بالمناسبة يا جماعة ما يحصل فى السودان هذه الايام (يقفل النفس) من الكتابة ومن باقى الابتسامة دى لو بقت عند الواحد (باقي ضحكة) او مساحة من الامل وارجو ان لا اكون مفرطاً فى التشاؤم …
وقبل ما تقول لي خير يا استاذ ..
دعني عزيزي القارئ ان اتوقف بك قليلاً خلال بعض مُصائب هذا الاسبوع .
أولاً ….
حكاية إعادة رموز الانقاذ من العسكريين والمدنيين من المستشفى الى سجن (كوبر) وما تبع هذا القرار (عديم المروءة) والبعيد عن نخوة السودانيين والمتنكر لمن افنوا زهرة شبابهم وعمرهم فى الدفاع عن هذا الوطن . وما تبع هذا القرار من التدهور المفاجئ لصحة وزير الدفاع الاسبق الفريق الركن عبد الرحيم محمد حسين والفريق (الخنجر) وما التمسه محامو الدفاع من المحكمة لاعادة موكليهم للمستشفى كون التقارير الطبية تؤكد حاجتهم للعناية الطبية اليومية .
هذا القرار وحتى هذه اللحظة لم يعلن عن الجهة التى اصدرته !! هل هو القضاء ام جهة سيادية ام هو سعادة الفريق البرهان نفسه! لا احد يدري
(حا) تقول لي وماذا سنستفيد من معرفة من اصدر القرار، صاح؟
اقول ليك انا ….
حتى يسجل التاريخ هذا العار وهذه السقطة الاخلاقية والتنكر المعيب لرفقاء الدرب والسلاح وحتى يسجل التدخل السافر فى شأن القضاء ان كان هناك تدخلاً. وان يسجل إن كان وراءه قاضي المحكمة حتى تقارع الحجة بالحجة القانونية من اهل الاختصاص اما ان يترك الامر هكذا (عائماً) فهذا لن تقبله الفطرة السليمة .
المهم لا بد من الافصاح عن الجهة التى تقف خلفه وللتاريخ
البرهان (ما دكتور)
قاضي القضية ليس بطبيب
ولا المحامين وهيئة الاتهام ليسوا باطباء .
اذا ارجعوا الامر لاهل الاختصاص من الاطباء المعنيين
واستحوا على دمكم يا من يطربكم مدح الاخرين (حد العرضة) واتقوا الله فيما يفعل بقادتكم ورئيسكم .
الجيش المصري …
أكرم قائده حسني مبارك حتى لقاء ربه فاين انتم يا من توصفون لدى الاخرين بانكم (اهل النخوة والكرم والشهامة واغاثة الملهوف) ونضعها بين قوسين استهجاناً ….
اما المصيبة (التانية) ….
[الانتباهة اونلاين] …تنشر بالامس وتحت عنوان [خلي بالك معاي] : –
قوات تابعة لجهة معلومة احتلت مقار الحزب ورئيسه الميرغني ونقلت عن الناطق الرسمي باسم حزب الاتحادي الاصل السيد عمر خلف الله فى تعميم (يوم امس الاول) ان قوات [دون ان يسميها] دخلت دار (ابوجلابية) ببحري وجنينة السيد علي الميرغني بشارع النيل بكامل عدتها وعتادها وحالت دون انعقاد اجتماع (اللجنة العليا لعودة الميرغني) و وصف السيد عمر هذا السلوك بانه بربري وغير مسؤول واكد ان هناك اجندة غير وطنية قصد منها ارباك المشهد دون ان يوضح ماهية تلك الاجندة .
(بعديها بكم ساعة كده …..)
موقع (كواليس الالكتروني) اورد الاتي وبرضو بالله خلي بالك معاي فى العنوان الاتي …
(قال ليك) عااااجل …. (اها) فى شنو خير إن شاء الله؟
قال ليك … (مسؤول بالحزب الاتحادي الاصل (بعدها نقطتين فوق بعض كده (:) مااالو ياساتر !! قال الدعم السريع يحتل عدداً من مقار الحزب لإجبارنا على تمرير وثيقة المحامين الدستورية !
ايوااا …
ده منو يا جماعة ؟ قال ليك مسؤول دون ان يذكر الاسم
لو ربطنا بين الخبرين لفهمنا الحكاية! وخشمي عندي و(هديييك) الحكومة امشوا كلموها ..
(وبرضو تقول لي الصوارمي استعجل) !
المصيبة (التالته) يا صاحبي …
حكاية اخذ القانون بالعضل ! ورغم ان العبد لله (ما ليهو فى الكورة) لكن الخبر البعمل الكاروشة ما بغباني خااالس فقال ليك …
(الجاكومي يكسر قفل بوابة استاد المريخ ويقتحمه بالقوة) ! وتابع الخبر ان نائب رئيس نادي المريخ السابق محمد سيد احمد الجاكومي (عمل الحكاية دى يوم التلاتاء الفاتت) والخبر اظنه كان مدعم بمقطع (فيديو) وشاكوش وحاجات بالشكل ده !
وعبر البطل (الغازي) عن رفضه لقرار لجنة تسيير النادي التى يقودها السيد ايمن مبارك وقال ان قراراتها لا تعنيه !!
(هى لكن …) يا جاكومي بعملوها كدا ؟ ياخي (علي الطلاق) لمن كنا صبيان نلعب فى نادي النهضة بالعيكورة ما كنا بنوع الفهم (العنتراوي) بتاعكم ده ! ياخ (انتا) ما عاقل؟
وكمان (قالوا قال حررنا الاستاد)!
ياخ نحن نلقاها منك واللا من الحركات المسلحة واللا من كيان الوطن ؟ (اللهم الطف بالسودان)
قبل ما انسى : –
سعادة الفريق البرهان (عاجبك البحصل ده) ؟
والله وتالله إن الله لسائلك عن هذه الفوضى فأعد للسؤال جواباً.
صحيفة الانتباهة
