بابكر سلك يكتب: تلاتة رؤساء وجاكومي
* ريسين غرقو المركب.
*على الرغم من ذلك.
*كل أتباع لرئيس يغنوا ليهو.
*عدي بينا وعدي بينا ياريس.
*ومركب المريخ حائرة لاعارفة تمشي مع الريس ده(مع التيار).
*ولا عارفة تمشي مع الريس داك عكس التيار.
*الفرقة والشتات والكيزان وروح الوصاية.
*أنتجت في المريخ تلاتة رؤساء وجاكومي .
*لجنة أب جيبين تعفي الجاكومي عن منصب رئيس لجنة الاستاد.
*وتطل علينا أخبار(إن صحت)بأن الجاكومي يكسر الطبل ويخت الفاس على كتف(هبل) ويدخل الاستاد.
*ثم أخبار أخرى بخروج قرار عن لجنة أب جيبين يقضي بتعيين(إعادة) الجاكومي رئيساً للجنة بتاعت الاستاد .
*اللاتي مسك العزة وماتن من الضحك.
*والفأس معلقة على كتف(هبل)و الجاكومي قدل.
*لن نسمح لأي زول أقر بصحة إقتحام الجاكومي الأول للاستاد.
*لن نسمح له بإنتقاد إقتحام الجاكومي(التاني)لنفس الاستاد.
*تبكوا بس.
*ومانحن فيه نتاج طبيعي لما نقوم به من تحزب ومكابرة ومحاولات الإنتصار للذات التي أوردتنا موارد الهلاك.
*حتى أضحى الهدف عندنا.
*أن ننتصر لرأينا .
*والمريخ يشوف ليهو طريقة ينتصر بيها بعيداً عنا.
*أيها الناس.
*الجدل البيزنطي لا يحل قضية .
*والمكابرة مابتودينا لي قدام.
*والإنتصار للذات مابصعد المريخ لمنصات التتويج .
*وأهو قدامكم .
*في الموسم ده بس خسرنا الممتاز والسودان.
*ونحنا ولا هنا .
*لأن خسارة المريخ بقت مابتهمنا.
*أيها الناس.
*إذا كنا جادين في حل أشكالية المريخ .
*يجب أن نحل إشكالياتنا النفسية أولاً.
*والإشكالات النفسية مابتتحل.
*إذا ماواجهنا بعضنا بكل شفافية.
*وإذا مابطلنا كسير التلج.
*والمواراة خلف الأحداث.
*فالصلح على شاكلة جيب يدك .
*صلح فاشل لأنه لم يناقش أسباب الخلاف أصلاً.
*من حق أي زول يكون عندو وش.
*ولكن من حقنا عليه أن يظهر بالوش الحقيقي.
*فمافي داعي للتستر خلف وجوه أخرى.
*أيها الناس.
*الفوضى في المريخ وصلت لدرجة. ممكن أي زول يقرر.
*أي زول يعين.
*أي هباب يتعين .
*أي زول يدخل ولو يكسر الطبلة براهو.
*المريخ بقى زي بيت الورثة .
*كلو زول بتصرف على كيفو.
*وارث عاد.
*ولكن هل فطن الورثة أن لفظ ورثة يعني موت رب الأسرة؟.
*قبل أن يتنازع الورثة في التركة.
*حقو يستروا مورثهم في الأول.
*فهاهو القبر ظل مفتوحاً قريب سنة ونيف.
*وكلو دقيقة نسمع الدفن الشهر القادم.
*المهم .
*نبارك للأهلة كأس السودان .
*والغريبة مافي سودان.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*انت يا والينا.
*وييين التوم هجو؟.
سلك كهربا
ننساك كيف والكلب قال بي كيمانكم دي كان إتقدمتو ده ضنبي.
وإلى لقاء.
سلك
صحيفة الانتباهة