بابكر سلك يكتب: وجع الولادة
*بعد مشيتنا ليبيا دي.
*تاني النسوان مابسوقننا بالخلا.
*مابتطنقعن علينا ويقشرن بوجع الولادة .
*وجع الولادة ضقناهوا في ليبيا.
*طلق طبيعي.
*وأخير أنحنا.
*في ناس تانيين ولدوا عديل كدة.
*حارس الخصم قاعد في دائرة السنتر!.
*هي الولادة دي كيف بس؟.
*المهم.
*هل سنخوض المجموعات بوجع ولادتنا ده؟.
*أين هيلمانة الأجانب الذين استجلبهم(الجهاز الفني) ؟.
*هل استجلبهم للدكة؟.
*طيب لزومها شنو الفكة؟.
*أيها الناس.
*تتغير الوجوه ولكن لاتتغير أساليب الإدارة لذا تتشابه النتائج.
*وسنظل طول عمرنا نحلم بالأميرة ولن نطولها إلا في النوم.
*عشان كدة قلنا العضوية أم راس هي التي تلزمنا.
*لأنها تأتي لنا بادارات واعية طالما كانت العضوية مستنيرة.
*أما العضوية بالراس .
*البسوقوها بالخلا.
*ويبيعوها الشمس بره .
*ده العضوية البتجيب لينا إداريين على شاكلتها.
*عضوية القطيع دي أو أعداء النجاح والتطور.
*تحتاج لإبادة جماعية .
*يجب أن نبيد القطيع وراعيهو البسوقو ويبيعو ونصيب القطيع لايتعدى قولة باااااااااااع.
أيها الناس
*ننادي باستقرار المريخ والإلتفاف حوله.
*ونحن نلتف عليه بالكيمان التي قطعت أوصاله .
*الاستقرار هو البعد عن الكيمان والإنتماء للكيان.
*والترفع عن الصغائر وترك الحفر ومحاربة البوكلينات.
*حتى البوكلين الرجع في الصبة لحقها أمات طه.
*يجب أن نحاربه.
*غير كدة .
*سنظل في تيهنا نحلم ونحلم ولن نطال أميرة أو مجرد ضفيرة على رأس الأميرة.
*المهم
*رفع معدل اللياقة البدنية.
*علاج كل المصابين.
*توفير المعسكر المناسب.
*هي متطلبات المرحلة ومطلوبات المجموعات.
*والإعداد للمجموعات يتيح له الدوري مساحة كبيرة.
*أرجو أن لانسمع بطلب لتأجيل مباراة دورية بحجة الإعداد والاستعداد.
*أيها الناس
*نبأ تماثل استاذنا القامة والمبدع الرائع اسماعيل حسن.
*زين الميديا ورقص قلوبنا طرباً.
*الحمد لله على نعمة الشفاء استاذي اسماعيل.
*وبركة البقيت (تسمع الكلام) وبطلت قوة الراس.
*المهم .
*المطرة الجات أول أمس دي فاجأني الغمام .
*حيرت كل الناس وغمتتهم ليك .
*بقت زي الشافع(الخلي البول في السرير).
*يومين تلاتة.
*أهلو بقو ينوموهو بدون بامبرز.
*ورابع يوم رشاهم ليك.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم .
*كان شفت يا والينا.
*الفاصل المداري وين ماعارفنو بقينا.
*خليها تطمبجنا يا والينا.
*يعني بقت علي المطرة ياوالينا.
سلك كهربا
ننساك كيف والكلب قال كان مطرت حصو كان مطرت بلوك كلو مافارق معانا .
وإلى لقاء .
سلك
صحيفة الانتباهة