تحت هذا العنوان كتب موقع (بقال برس) وأظنه تبع (ولدنا) إبراهيم بقال ! الله أعلم حميدتي يرسم مستقبل التعليم فى السودان !ما تعاين لى ياخ ده ياهو القريتو!
(اااي) ما في مشكلة (الخال) يدعم وجبة الفطور واللا يبني فصول أو مدارس ، يدعم المعلمين (مش عارف) يرقعك ببوكسي كده مرة واحده ما قلنا حاجة !
لكن يرسم مستقبل التعليم لا لا يا موقع (بقال برس) الكلام ده ما طبيعي وأمكن يكون كتب تحت تأثير الـ …. ( واللا بلاش).
حميدتي شنو يا جماعة ….
البرسم ليهو مستقبل تعليم ياجماعة كمان ماتسوقونا بالخلاء للدرجة دي ياخ . نعم عشنا وشفنا لمممن شفنا الخال رئيساً للجنة الاقتصادية وكووول شهادات الدكتوراة بتاعت المؤسس و وزير ماليتو ود البدوي يوم داك واقفين. وراهو قلنا (ماشي) وللضرورة أحكام و قلنا الكاش بقلل النقاش وأوجدنا العذر للوقفة المستفزة للعلم وأهل الاقتصاد .
لكن حكاية يرسم مستقبل التعليم عشان جاب ليهو وجبة فطور واللا كتاب دى بصراحة ما بتنبلع خااالس
قول لي قضيتك مع الزول ده شنو ؟
أقول ليك أنا ….
أووول حاجة التعليم ده بحر واااسع وحقو زول ما متعلم واللا تعليمو نص كلتش كده يقيف بعيد يشيل الأبريق بكل إحترام توقيراً للعلم والعلماء ، وبعدين دق الطار البلحييييل ألبسوا فيهو بعض الإعلاميين ده والله عيب فى حق من يمسك بقلم والله عيب جد . بعض الكتاب سابقاً قالوا إن (الخال) ظاهرة كونية ستنقرض و طالبوا الناس بالصبر ويومها زعلنا ودافعنا عن الخال لكن بصراحة مننن يوم بدأ يشتت في البكاسي الكلام ده بقى ما واقع لي نهااائي . عشان كده يا جماعة ما معقول كل يوم تورموا فشفاشنا بجنس الورنيش ده (قال يرسم قال).
أحد الظرفاء مرة لقط ليهو جملة كده من بتاعات الخال من النوع أبو كديس ديك فإتصل بى مهاتفاً وضاحكاً فى ذات الوقت قائلا لي يا أستاذ نحن السودانيين فهمناها تب و حميدتي ولدنا ومجبورييين عليهو لكن المحيرني الجملة دى يترجموها للخواجات كيفن !.
عشان كده ياجماعة ونحن نحتفل مع معلمينا الاجلاء بيومهم العالمى ما تطمموا بطنا بجنس (الطار ده).
ما يخالف ياخ ….
الخال يرقع الإدارات الأهلية بالف وثلاثمائة (بوكسي) أو يدي فلان مش عارف خمشة كده من الدولارات واللا الشغلانة ترطب معانا يقول لناس مكتبو نادوا لي عمنا (العيكورة) ده النبهلا معاهو كلو وارد لكن (كونو) يصبح فجأة (راسم) لمستقبل التعليم فى السودان !
القروش والعضلات ما كل شئ …
فقديماً قال الشاعر العلم يرفع بيتا لا عماد له.
والجهل يهدم بيت العز والشرف.
يعني (عمنا) الشاعر ما قال الحكاية ضحاكات وبكاسي وكده قال (علمممم) فمن يفهم الخال ومستشاري الخال إن التعليم لا يحتاج لوجبة هنا وهناك أرفعوا يدكم عن آبائهم وفروا لهم سبل الكسب الشريف (أربطوا يد الفكي) من جباياته المتصاعدة فسيطعموا أبنائهم ويكسونهم ويعلمونهم ! اين الدولة أيها المستشارون أما تستحون أن تقودوا الإعلام ان يكتب عن (وجبة فطور) لنائب رئيس مجلس السيادة !
استحوا ايها النفعيون وأنصحوا هذا (الرجل الطيب) أين ينفق أموال الدعم السريع !
والله لو كنت قاضياً لحاكمت البشير عن جرم واحد هو (صناعة حميدتي) و لكافأته عن بقية صنيعة طيلة سنوات حكمه .
قبل ما أنسى : —
ومن ما يسأل عنه المرء يوم القيامة عن ماله مما إكتسبه وفيما أنفقه ..
الجماعة ديل ناسين اليوم ده واللا شنو؟
اللهم قد بلغت فأشهد.
صحيفة الانتباهة
