بابكر سلك

بابكر سلك يكتب: تلوث نووي

* سمعت لي تسجيل صوتي للكوتش شوقي عبد العزيز.
*استنكر فيها بشدة خطوة مجلس الهلال المنتخب بإعادة قيد رباعي الهلال هيثم والمعز ومهند.
*طبعاً إعادة القيد ماعشان يلعبوا.
*ولكنها لمنحهم فرصة أن يختموا حياتهم الرياضية بالهلال تمهيداً لتكريمهم.
*ده رأي العليقي والسوباط الدخلو الوسط الرياضي (بوكو) وإترخصوا ودردقوا في الشارع مع كل الوسط الرياضي.
*وبالتأكيد الفكرة ماحقت السوباط ولا العليقي.
*ولكنها فكرة قديمة وسنة في الوسط الرياضي من السنن الجميلة.
*كبتن شوقي مادخيل على الوسط الرياضي ولابوكو تم تقنينه في المنطقة الحرة(قري).
*زول أصيل وقديم ومواكب.
*عشان كدة رفضو للفكرة ماكان متناسب مع تاريخو.
*وتعصب الكوتش شوقي للهلال لهذه الدرجة.
*هو في حقيقته من قبيل التعصب السالب البقوم على تحطيم الند دون التفكير في تقدم النادي الذي ينتمي له.
*وكوتش شوقي حر في إعتناق شكل التعصب الذي يريد.
*لكنه ماحر في كيل السباب للغير.
*قال فوزي مستنكراً إعادة قيد هيثم.
*ماممكن يمشي يتلوث في المريخ ويجينا راجع.
*لاحظ يتلوث.
*ماداير أضغط على الرجل.
*ولكنها كلمة لاتليق بالمريخ ولا تشبهه.
*فشوقي بعرف المريخ من زمن كمال عبدالوهاب بحاورو بطريقة اغنية الحقيبة أنا والتمني.
*أمشي وأجيهو راجع….راجع..
*وكنا بنلقى ياكوتش الفرق شاسع.
*ولكن لم نسئ للزول الحاوروهو ولسة واقع.
*لأن الفرق شاسع.
*أنك تعرف المريخ وتعرف الله واحد من كمال يستلم الكورة وكلكم تترتروا.
*منكم بدأت الترترة في السودان.
*وتتعازموا.
*خش أنت لاخش أنت.
*والبخش والمابخش كلكم بتتحاوروا زي السلام عليكم.
*وماكنا بنضحك.
*لأن الفرق شاسع.
*عشان كدة ماظنيت كبتن شوقي قصد كلمة (يتلوث)دي.
*وكان قصدها.
*يكون مفتكر المريخ ده مفاعل نووي.
*بفرتك الناس ويشتتهم.
*لأنو شاف بعينو وإتفرتك مع الناس.
*كلو من كمال عبدالوهاب.
*ناس فاطيما إفريقيا الوسطى قالوا الزول ده مامعاكم.
*وناس إثيوبيا قالوا ده جن عديل كده (هدف التأهل لميونخ).
*وأهم ناس الهلال قالوا مفاعل نووي.
*كلو من كمال عبدالوهاب.
*وقريباً كلو منك ياتشتش.
*سؤال بمنتهى الروح الرياضية.
*قبل مباراتكم ضد المريخ كنتوا بتقدروا تنوموا؟.
*عليك الله كم يوم قبل الكورة بتتكلموا عن كمال عبدالوهاب؟.
*ويسألك الله كم مرة ناس دفاعكم بضحكوا في واحد فيكم لما كمال يحاورو؟.
*سؤال أخير
*محاورة حاورك ليها كمال عبدالوهاب وعجبتك أحكيها لينا.
*ياكوتش شوقي.
*الدحيش برضو إتلوث؟.
*حمودة وعلاء جوكم ملوثين؟.
*طيب أسي مافضل ليكم إلا تفاوضوا حازم وودالجزيرة.
*مالكم دايرين الملوثين؟.
*معقولة زول يجي من نادي صفري لنادي بطولاتو الجوية تملأ طيارة شحن يكون إتلوث.
*أمال البجي من نادي جوي لنادي أرضي بكون شنو؟.
*إتلبش؟.
*ياخ هيثم لعب في الهلال سبعطاشر سنة.
*قابل كاني ماني التنزاني.
*والبفرا اليوغندي.
*وسكو سكو التشادي.
*وحايتو الأريتري.
*لعب في المريخ شهر قابل بايرن ميونخ.
*تقول لي إتلوث!.
*قلت ليك المريخ ده مفاعل نووي ياكوتش.
*أها.
*نجي لي شمارات والي الخرتوم.
*كان شفت ياوالينا.
*الثورة الفرنسية مية سنة مدورة فينا.
*الفورة مية ومامستعجلين يا أخينا.
سلك كهربا
ننساك كيف والكلب قال والله تاني جداد يكاكي مادايرنو
وإلى لقاء.
سلك

 

 

 

 

 

صحيفة الانتباهة

اضغط هنا للانضمام لقروبات كوش نيوز على واتساب

قروبات كوش نيوز الإضافية




زر الذهاب إلى الأعلى