بابكر سلك يكتب: الأسبوع ده مافيهو جمعة
*ماتقول لي الشوط التاني كان غير.
*لاكان غير لاشي.
*لكن أقل سوءاً.
*بعضنا شافو غير.
*لأنو الطشاش في بلد العمي شوف.
*البعمل فيهو المريخ ده ماكورة.
*دي موش كورة.
*دي كمبلت.
*كمبلت موش العندو الكورة الناس بتجري منو.
*يقوم يعزل ليهو واحد يلفخو بيها؟.
*طيب الحصل أمس ده كورة ولا كمبلت؟.
*تلفخ زميلك بي باص.
*تقول لفخو باص الوالي.
*وبعضنا يقول ليك الضغط.
*وحامل الكرة.
*الاستحواذ.
*الحركة بدون كرة.
*وبصمة المدرب.
*المدرب ده لو من جانا دخل أيدو في جالون بوهية.
*وطبعها على حيطة.
*بصمتو مابتظهر بالسرعة دي.
*أخي الكريم.
*راجع جميع القروبات أثناء الكورة.
*تجد غالبيتنا يسب ويسخط ونحن متأخرين بهدف .
*نتماسك ونصمت وندعو للنصر لما تكون لسة تعادلية.
*ثم نهلل ونفرح ونمدح ونتفلسف على شاكلة حامل الكرة والتصويب من خارج المنطقة.
*إنفعالاتنا ذاتها إنطباعية.
*دي ماكورة.
*بالطريقة دي إلا نتصل بالإرصاد عشان نطلع لينا بفتوى.
*الأسبوع ده مافيهو جمعة.
*لأنو بي طريقتنا دي الجمعة إلا نصليها جمع تقديم ونبقى على سفر.
*ده مافريق بنقابل بيهو فريق مستقر.
*على الأقل تدريبياً وإدارياً وماعندو مصابين.
*نحنا المصابين عندنا شدت ماكتار.
*قربنا نعمل ليهم دمغة جريح.
*معقولة ياخ.
*المهم.
*قصة التفسيرين بتاعات قرار كاس دي لسة ما إنتهت؟.
*إلى أن تنتهي.
*عندي حتة واجعاني ومحيراني.
*داير ليها إجابة.
*كاس(الله لاجاب عقابها).
*كاس الجن دي.
*قبل صدور قرارها الأخير الذي فسره (إيال هامد)تفسيراً يختلف عن تفسير(إيال أندالرهين).
*كاس الجن دي .
*في مخاطبة للإتحاد بإجراء تحفظي.
*دحين ما قالت ليهو يا إتحاد ماتتعامل مع مجلس حازم؟.
*إن كانت الإجابة بنعم.
*بعد المخاطبة إياها الإتحاد مفروض يتعامل مع مجلس منو؟.
*ولا كاس قالت الإتحاد مايتعامل مع مجلس حازم ويظل المريخ بدون مسؤول يتعامل معه؟.
*هووووي يا إيال أندالرهين.
*ماتلولوا(بكسر التاء)الكلام.
*لما كاس جابت كلامها بتاع ماتتعاملوا داك.
*قالوا ليكم جراداي في سروال ولابعضي إلا قعادو شين.
*أها أسي حالكو ده ماياهو قعاد جراداي في سروال؟.
*أيها الناس.
*ماتنسوا الدعاء للشايقي.
*أيها الناس.
*إن تنصروا الله ينصركم .
*أها.
*نجي لي شمارات والي الخرتوم.
*كان شفت يا والينا.
*عشرة مليون جنيه حتي تغدينا.
*محترفين نحنا يا والينا؟.
سلك كهربا ننساك كيف والكلب قال زمان بنعرف مستواكم من باقي الغدا البتكبوهوا لينا….أسي مستواكم ليق وكلامكم كلو ما إتغدينا .
صحيفة الانتباهة