قال سنعبُر
قُلنا كيف..؟
ورينا وين درب العُبور..؟
نبراك نبارِك خطوتك
ندعم مسيرتك ونفرتك
ومهما طالت سِكتك
معاك يا سيدي نصبُر
نجتهِد شان بُكرة نعبُر
والعُبور دايرلو خُطة
وين خُطتك..؟
عايزلو عِدة
وين عِدتك..؟
وين المواد البيها نبنيهو الوطن
للكُسور الفيهو نجبُر
للجروح الغائرة نسبُر
ملّينا من حِلو الكلام
ضيّعنا بيهو كتير زمن
دمّر بلادنا بقت حُطام
اتأخرت صابا الوهن
مين العبر قدامنا يا زول بالحِلِم..؟
سمّوك مؤسس شان تأسِس بالفعِل
ما بالنضِم
جبناك توحِد للشتات تجمع تلِم
تدوِّر المَكن الوِقِف
تغيِّر الطَرف التِلِف
تردع الزول البِسِف
أموالنا بالدس والخطِف
ما تخلي فاسِد مُنحرِف
شان ندعمك ومعاكَ نعبُر
نشارك الثُلة الزمان ومعاها نشكُر
نرفع الصوت بالهُتاف
شُكراً مؤسِّس نعترِف
إنّك كبير
وريتنا وين درب العُبُور
صحيفة الجريدة