بالفيديو : زواج كنداكة من جياشي داخل اعتصام القيادة العامة

انتشر مقطع فيديو في مواقع التواصل الاجتماعي يوثق لزواج إحدى الكنداكات من جندي في الجيش السوداني من داخل ساحة الاعتصام .

ووجد مقطع الفيديو ردود أفعال واسعه وسط رواد مواقع التواصل الاجتماعي حيث علق أحد المعتصمين : الجياشة شغالين من طرف كدا الثورجية و الشفاته حيزعلو يا بنات .

وقال آخر : نحنا اتسكينا بي التاتشرات لمن قلبنا وقف , وتلبنا في البيوت زي الحرامية .. واستنشقنا بمبان لمن قلنا بس واعتقالات تقيلة ودق واعتصام تحت الشمس حرقتنا وطلعت عينا .. وأصواتنا راحت وريقنا نشف ونمنا في الظلط , والرصاص راشي فوقنا .. ونقعد كم يوم بدون حمام , واتبهدلنا واتبشتنا عشان يجي الجياشي دا من حيث لا يحتسب تجيهو حاجة ذي دي ويعرسها كمان ونحنا نطلع ميطي.

وبحسب متابعات محرر كوش نيوز يبدو أن التقدم بطلب يد العروس جرى بشكل عفوي، وبحضور أهلها .

وظهر في الفيديو المتداول العروسان يمسكان أيدي بعضهما، في حين تعالت الأصوات والأهازيج من حولهما.

وراح أحد المعتصمين يغني:

“حتسقط وحنعرس حنعرس كنداكة
حتسقط وحنعرس ونعرس جياشة”.

يذكر أن الاعتصام  انطلق منذ السادس من أبريل الجاري للعام 2019 أمام مقر القيادة العامة للقوات المسلحة .

الخرطوم (كوش نيوز)