أترك باباً بيني وبين الله!

أحياناً تستفزني بعض الكتابات التي أراها ماثلة أمامي على أبواب فيسبوك أو واتس اب..
فأجود على نوافذي بما أظن أنه سيعجبكم أيضاً..
اليوم نوافذي مشرعة لامرأة تكنى بأم مؤيد.. لأنها هي التي كتبت هذه الخاطرة..
ياخ انت مش قبيييل كنت (بتشاغل)؛ وهسي (بتصلي)؟؟ وعامل فيها (شيخ)!
إنتي مش (ما بتصافحي) ؟؟
طيب مش مفترض (تتنقبي)
يا تاخديهو كلو يا تخليهو كلو!
قلت لي (صايم) ؟؟ بعد عمايلك دي كلها وصايم؟؟

دقيقة يا أخوانا
في مفهوم غلط ماشين بيو كمعتقد وك حاجة مسلّم بيها اللي هي: مدام إنك عملت غلط
فالمانع شنو إنك تعمل غلط تاني وتالت ورابع!!
الإتبلبل يعوم

أسمع القصة دي:
كان “سهيل بن عمرو” على سفر هو وزوجته، وفي الطريق اعترضهم قطاع الطرق وأخدوا كل اللي معاهم من الأكل والمال؛ فاللصوص قعدوا يأكلوا الأكل المسروق ده، فانتبه “سهيل” إنو قائد اللصوص قاعد بعيييد وما بياكل معاهم؛ فاستغرب وسأله ليه ما شاركتهم الأكل؟.. فاللص قال ليو إني صائم!
استغرب “سهيل” وقال ليو: تسرق وتصوم؟؟
تتوقعوا إجابتو كانت شنو؟؟
قال ليو: إني أترك باباً بيني وبين الله لعلي أدخل منه يوماً!
متخيلين معاي؟؟ وهو قائد اللصوص؟
المهم بعدها بفترة، “سهيل” شاف اللص وهو في الحرم متعلق بأستار الكعبة، وأصبح عابداً زاهداً
ولمن شاف “سهيل” وعرفه قال ليو:
“أورأيت من ترك بينه وبين الله باباً دخل منه يوماً”.
فـيا أخوي الحبيب وأختي الغالية
حتى لو كنت صاحب معصية معينة
دا ما معناتو إنك تطرق كل أبواب المعاصي بحجة أإنك مذنب
(أتخيل معاي إنك بتمشي في عز النهار وفردة حذائك اتقطعت، حترمي التانية برضو بحجة إنو بدل تتحرق رجل واحدة أحسن يتحرقو الاتنين؟؟
بل بالعكس، حتحاول بأقصى ما يمكن أنك تصلح الفردة الاتقطعت، وقاية لرجلك من الشمس!.. فضلاً عن انو ترمي السليمة!
}الخلاصة
دايماً خلي في خط للرجعة ودايماً خلي في خطة بديلة..
وخلونا نبطل (نكسر مجاديف بعض)
لو شفت صاحبك على طاعة شجعو وما تحبطو ياخ حتى لو كان مليان معاصي..

لا تقطع كل الحبال مع الله

أورأيت من ترك بينه وبين الله باباً مفتوحاً دخل منه يوماً