حكى الطالب بكلية الصيدلة أحمد المجتبي والذي فجع رواد موقع التواصل الإجتماعي “فيسبوك” برحيله قصة معاناته مع المرض والإهمال الذي تعرض له في سلسلة طويلة كشفت عن موهبة الراحل الكبيرة في الكتابة والسرد.
وبحسب تدويناته التي كتبها قبل رحيله وقرأها محرر موقع النيلين فإن أحمد المجتبي كشف عن المعاناة الكبيرة التي عاشها قبل بتر قدمه وبعدها.
وبدأ طالب الصيدلة التدوينة بعنوان “الأخطاء الطبية حقيقة ؟ ” دي ما مجرد عناوين بتطلع في الصحف و الجرايد و كلمات بتتكتب في منشورات !
دي قصص حزن و دموع و معاناة و حياة أسرة كامله بتقيف ، و مصاريف ماليها أول ولا آخر ، و تعب و سفر و سهر ، و مصائر ناس بتتغير ، من طالب مثلاً لمعاق . . و ما بتستاهل منكم كل الضحك دا و الهظار و الإستهتار و الإنكار دا ؟ و الردم و خوفي من الردم
دا أنا نفسي و ما زول غريب ، و دي الجريدة 2011 ودا عنوانها الصادم قدامكم ، الجريدة غلطانه و الصحفيين غلطانين و ستين غلطانين لأنهم بكتبوا كلام عام ولأنهم ما بفهموا في الطب و دا حقيقه و أنا بعيب عليهم كدا ، لكن في دكتور مستعد يتعاون و يكون محايد و يشرح ليهم الموضوع بطريقة علمية ؟!
الصورة دي و الحوار دا اتأخدوا من جوه المستشفى مستشفى الخرطوم الكبير و العريق ، لكن مافي دكتور مستعد يدي تصريح ولا يوصف الحاصل!
قراية المقالة في الجريدة دي ما حا تفيدنا حاجه ، لأنة كلام عام ساي و كله غلطات في غلطات ، الرجل ما اليمين و السبب المباشر ما الزائدة و الدكتور نفسه ما كان غلطان بالطريقة الصورها الصحفي . .
القضية في المحكمة اترفعت و ماشيه ، لكن ما ماشيه ! حاولت كتير مع أبوي و مع المحامي انه ننهيها و ننسى الموضوع و نسامح و تكون لي دافع أنا و أعمل بنفسي و اجتهد ، لكن أبوي الوجعه بتاعته شديده ، كلم الدكتور في مرة ولدي دا رجله برجلك و رقبته برقبتك ! أنا متأكد دا كلام ساي من أبوي و ما بعملها لأنه راجل طيب و بسيط و زول بخاف ربنا . .
بالسنين وقف من شغله و اتغرب من بلد لبلد و ملايين كتيرة اتدفعت ، ما ببالغ لو قلت الاتصرف قريب نص مليون دولار ! من سفر و تذاكر و عمليات و إقامه في مستشفيات و علاجات . . .
شنو الممكن يعوضنا عن دا كله ! و السنين و الدموع و الخوف و التعب و الآلم ماف حاجه بتعوضه . .الحمدلله ، انا ما جاي أشكي و لا عايز اي حاجه لنفسي الصراحة !
أنا بس حا اعرض ليكم الموضوع و عندكم الحرية الكاملة تأخدوا منه الفايده لو شفتوا فيه فائده . .
السؤال ال في ذهنك الآن و أنت متأكد وينو هسي الخطأ الطبي ؟
اجابتي هو ما خطأ واحد هي أخطاء و ما من دكتور واحد هم دكاترة ، بالعشرات و في عشرات المستشفيات و في بلدان مختلفه !
قدر دا ! والله قدر دا
لمن التشخيص الصاح ما يتعرف و العلاج المناسب ما يتاخد و حالة العيان كل يوم بتسوء و مع كل إجراء بتعمل من الدكاترة ديل الوضع ببقى أكعب ، و فوق دا كله التشخيص كان متاح و كان بسيط و بسيط شديد و العلاج أسهل من الساهل ، دا اسمه شنو ؟ خطأ طبي ولا حاجه تانيه !
طيب الكلام العام و الساي ما حبابو :
في العام 2008 الم في البطن و فقدان للوعي حمة شديدة ، مستشفى خاص ، عملية زائدة مستعجلة ، انتهت العملية بعد اكتر من تلاته ساعات ، الزائده سليمه و ما ملتهبه ، لكن لقينا المصران متقيح و شايل صديد و إستأصلنا منه جزء و دي العينه و دوها المعمل نشوف الحاصل شنو . .
العينه ( نضيفه الحمد لله ) ، لسا العيان في المستشفى ، انابيب موصله من الانف بتطلع مواد تلاته يوم راقد في السرير ، الرجل ظهرت فيها حاجه غريبه محمره و سخنه منطقة الساق ( رأي الدكتور بتاع عملية البطن ، البطن دي تبعنا لكن الرجل دي جاتنا فوق للبيعه ) ،
التشخيص : جلطه ، لا ما جلطه ، التهاب في الأنسجة ، لا خراج ، المهم عملية تاني ، نفتح و ننضف و نستكشف ، راحت فيها عصبة حصل طوالي Drop foot ، من يومها الرجل تاني ما شافت العافية ، الجرح في الساق خارج عن السيطرة بزيد و يزيد ، أول حيرة لدكتور مع الحالة دي ، مضادات حيوية قوية ، ماف فايدة ، تكاليف المستشفى كتيرة علينا ، خلاص نطلعكم البيت و تعالوا أعملوا الغيار هنا كل يومين ، مع كل غيار الجرح بزيد الأنسجة ميتة و الحالة بتصعب ، الدكتور السوبر بتاع كل حاجة ، أخيراً ، نحولكم لدكتور عظام يشوف الحاصل شنو ، دكتور العظام ماف جديد عنده ، بس الغيارات ، و الحال بيسوء كل يوم ، و مشي ماف ، و العيان الجى داخل برجلينه ، و لسا ما استوعب أنه بقى معاق ، بشيلوه شيل ، بشيله أبوه و بيخته .
مستشفيات كبيرة مريت عليها السلاح الطبي و الخرطوم و سوبا الجامعي ، أكبر مستشفيات البلد ، أكبر دكاترة البلد بمساعدينهم ، ما عندهم أي حل ولا تفسير للبحصل دا ، جروح ما بتبرأ بنعمل ليها كل حاجه و ماف فايدة . . كنت بدخل المستشفيات دي و بقعد فيها بالشهور ، و بنطلع أكعب من الأول ، سافرنا مصر ، المصريين بدورهم ما قصروا ! شغل شختك بختك و عملية وراء عملية وآلاف الدولارات بتدفع و عملية ترقيع Skin graft بتتعمل و بتفشل ، و جروح زيادة ( إبنكم دا ماله ! حا يجينني خلاص )
من دكتور لدكتور و من بلد لبلد و من محافظه لمحافظه ، نقنع و القروش كملت نرجع السودان . .
مقابلة مع دكتور العظام ، يغلبه يقول الشايفه في الصور بتاعت الأشعة !
محمد في التهاب شديد في العظم و تآكل في مفصل الركبة وماف حل غير انه نقطع ليك كراعك دي !
يا دكتور دا كلام شنو ؟ بعد كل التعب دا !
اي والله ماف حل غير كدا ، و أمشوا لدكتور فلان جاي من المانيا ودي الورقه و شوفوا رأيه برضو ، و أسألوا في كم حته ، و فعلاً نفس الكلام سمعناه . .
الحاصل osteomilitis و حاجه في مفصل الركبه زي rehumatoid arthritis ، و إذا ختيت معاها الحاصل من التهاب كان في الأمعاء و نتيجته نضيفه داك inflammtory bowel disease
و جروح مافيها infection و بعد كدا ملتهبه و بتزيد ! أها أنت كدكتور وصلتا لشنو ؟
الموضوع ظاهر شديد صاح ! و ضيف لكدا فحص الدم بتاع الCBC ببين دائماً انه نسبة ال lymphocytes زايدة شديد و في Lymphoctosis ، بس دكاترتي كانوا بفسروها بالتفسير القريب ، أنه الحاصل دا بسبب الإلتهاب ما بسبب حاجه تانيه . .
اتوكلنا و اقتنعنا و جات مواعيد عملية البتر ، مستشفى الخرطوم العريق أكبر مستشفى في البلد
الجراح ، رئيس قسم العظام نفسه ، اتعملت العملية
و أنا بتجهز للعملية ، دكتور تاني بناقش دكتوري ، ليه ياخ نعمل له amputation ماف داعي ! مافي حل تاني و الولد لسا صغير ؟
دكتوري مصر انه لازم ودا الحل الوحيد و الأسهل و العملي ، عشان الود دا يرتاح و يشوف و يكمل حياته بعد كدا .
و الحقيقه قبلها مشينا السعودية و عملنا فحوصات شاملة قبلها و صور أشعة متطورة و بالالوان و صبغات معينة و كمبيوتر ، و كلمونا انه العلاج في ، لكن عمليات ممكن تصل لتسعه عمليات و ممكن تنجح أو ما تنجح و بنوصي بالبتر ، و نرجع تاني لغرفة العملية ، عيبي اني بعرف انجليزي كويس و دي كانت بتزعل دكاترتي الماعيزين زول يتدخل في شغلهم ، و بقولوا لي كل مرة ( دكتور انت ولا انا )
سألته ، الكلام البقولوا الزول دا رأيك فيه شنو ؟
قال لي سيبك منه ، أنا مش دكتورك و بتثق فيني !
و الدكاترة كلهم مش قالوا ليك كدا ؟ طيب تاني مالك ! اهدأ وخلينا نشتغل ، سلمت نفسي و وصيته الوصيه الاخيرة ، طيب عليك الله يا دكتور ما تقطعها من فوق شديد ، اقطعها من هنا فوق الركبه طوالي كويس ؟ حاضر خلاص كويس . .
عمري كان 17 سنه ، لاحظت لحاجات كتييير و قريت في النت أطراف الموضوع ، قلت ليهم اسمعوا المضاد الحيوي دا قاعد يأذيني و ببوظ الجرح ! و المشكلة من المناعة ؟ كلام غريب صاح ؟
قلت ليهم الكلام دا كتير ، لكن كل مرة كانوا بهرشوني و بطنشوني و بتعاملوا مع ظاهر الموضوع . . بعد عملية البتر تاني نفس المشكله من جديد ، جرح البتر ما بيبرأ و التهب و الخيط اتفك و جرح فظيع قاعد قدامنا ، و جلطة في الرئة حصلت و الدم أقل من ستين ، و دخلت العناية المكثفة و نسوا الجرح في العناية المكثفة و اهتموا بالجلطة ، شفت هناك إهمال ما بتوصف ! كنت واعي وباقي العيانين نايمين ، كل يوم كان بشيلوا زول ميت من جنبي ، شفت هناك دكاترة صغار في العمر ، شباب كدا .
شفتهم بيخلطوا اليوم كلوا ! بيشغلوا بالنهار أغاني جعلية و الدكتور الجعلي بقوم يعرض و يبشر ، شفت الدكتورة الحلوة يوم واحد ما هبشت عيان ، بتتشهى كل يوم و بتقول نفسنا في بيتزا نفسنا في سمك ، و بجيبوا الحاجات دي و بياكلوا ، و بالليل ، شفتهم لمن النور طافي بيتونسوا و يحبوا في بعض ! وسط الناس الميتين ديل . .
قلت ليهم عايز أمي عايز أشوفها عايز أشوف أبوي قالوا ممنوع ، كوركتا و صرختا ، قالوا لي ماف فايدة ماف زول بسمعك ، الجرح المنسي كان قاعد يلتهب و الحمى زادت شديد زي الجمرة ، عايزين ينزلوا لي الحمى جابوا الهدوم اللونه ازرق و ريحتها كريهه شديد بتاعت ( جيمس ) بتاع النضافه الكان بجي يغسلني بعد مرات و مرات بسيبوني بوسخي لحدي ما يجي
جابوا هدومه دي و بلوها بالمويه و ختوها لي الدكاترة في صدري و بطني و تحت ابطي و عايزة تختها في رأسي ، بكيت شديد قلت ليها حرام عليكم ، ليه بتعملوا فيني كدا أنا عملت ليكم شنو ما لقيتي قطعه غير الهدوم دي !
قالت لي دي حتات معينه بننزل بيها الحراره و هسي بتنزل روق . .
لمن أزعل منهم شديد بقول ليهم حا افضحكم والله حا افضحكم و طلعوني من هنا سريع ، ناسي المتابعني بتاعين العظام شكلهم نسوني ! لا حس ولا خبر ! اليوم جمعه اخو الدكتور صاحب عمي ، جابوا لي الدكتور الكبير من بيتهم يوم اجازته ، أهلي عايزين يعرفوا حاصل عليّ شنو ؟
جا الدكتور ، كان هايج شديد ! شاكلهم شكل شديد عيان دمه ستين و طالع من عمليه وجرحته سايبنها تعفن ، و ما بتجوا تشوفوه ! الزول دا لو حصل له حاجه انا بحملكم المسؤولية كاملة !و يلا طلعوه لي من هنا سريع بلاش كلام فارغ معاكم . .
كنت زعلان اني فاهم انه وضعي باظ شديد ، لكن كنت فرحان اني حاكون مع امي و ابوي و الكابوس البشوفه في الانعاش دا خلاص انتهى . .
كنت بدخل في الاسبوع غرفة العمليات مرتين للنضافه مرت أسابيع وماف أي فايدة الجرح جاب دود ! و أنا في المستشفى ياناس
بجي نائب أخصائي العظام ، بقول دي حاجه غريبه لكن حا نعمل كونسلت طبي و نجتمع كلنا مع اخصائيي الدم و الجلدية و المناعة و ناس الإنفكشن
و نشوف الحاصل شنو ؟
و جاء اليوم المفروض يجتمعوا فيه ، و مستنين بفارق الصبر ، جاء داخل النائب براه ، و الله ما قدرنا نلمهم الناس ديل . . ! ماف اي تحسن ، عيد الضحيه قرب ، جا الاخصائي قال لي : شوف يامحمد انحنا عملنا معاك كل حاجه و جربنا اي شئ ، و خلاص الدنيا قبائل عيد ، و أنا عملتا ليكم خروج ، تطلعوا هسي و تعيدوا تنبسطوا و تجوني في العيادة بعد العيد ، و ما تأخد ولا حبه ، كل علاجاتك تقيف ، حقن السيوله و المضاد و كله ، بس دا مسكن كتبته ليك للالم ترامادول . .
طلعنا البيت و الممرض بجي يغير لي ، و انقر شنو ؟
تحسن كبير لمن ما مصدقين سبحان الله ، لمن رجعت له بعد العيد اتحير . .
عشان ما أطول عليكم و اجيب من الآخر ، مشينا الإمارات زيارة و الحال هناك ما اتغير نفس المشاكل و حصل ابسيس كبير شديد ، و دخلت الطوارئ و عمليات و علاجات ، لكن الفرق هناك ، قلت للدكتور ود الحلال نفس الكلام ( بتاع المناعه و المضاد الحيوي ) الكلام الكانوا بستهتروا به في السودان ، اخد كلامي بمنتهى الجدية ، بعد ما استعمل معاي أقوى المضادات الحيوية و أحدثها و ماف نتيجة ، و ختاني طوالي في علاجات مناعية زي immunoglobulin و عمل الماقدروا يعملوه في مستشفى العاصمة ! أكبر مستشفى في بلدنا البنبكي عليها عشان عايزين يزيلوها ، استدعى كل التخصصات تقريباً و بعد يومين اجتمعوا كل الاخصائيين و كل زول طلب فحوصاته ، و جاني راجع يا محمد انت صاح في مشكلة في المناعه بنسميها مناعه ذاتيه تبع الجلد تبعك و فعلاً المضاد الحيوي ممكن يزيد القصة . .
. .
و هسي أنا كبرتا و اتعلمت سنة واحدة بس و بقيت عارف انه الكان حاصل كان عبارة عن Autioimmunity ، و المضاد الحيوي بالذات البشتغل على ال Bacterial cell wall synthesis و بالذات لو كانت سالبة الجرام ، حا يتسبب انه في مواد في جدار الخلايا دي و المواد دي cytotoxic تطلع و تعمل بهدلة شاملة و تفعيل للمناعة الاصلاً هي Defect ، و انه بالتحديد الحاصل في الجلد عنده اسم و معروف في كل العالم ايوه صاح نادر ، بس موجود ، صنفه الكبير Auto inflammatory disease و بالتحديد neutrophilic dermatosis و بالتحديد أكتر pyoderma gangrenosum
و ليك تتخيل معاي علاجها بسيط قدر شنو ؟ Immunosupressant agents
و بالذات كورتيزون 40 او 30 ملجم و الموضوع و وفق لكل المصادر و المراجع و الداتا بيسس و ال clinical trials حا يتحل بنسبة 99 في الميه و كل المشاكل تروح . .
لكن ، و معليش اقبلوها مني يا اصحابي ، دكاترتي ال بالعشرات المريت عليهم ديل و ال في السودان و برا السودان ، ما كان فيهم دكتور واحد فاضي انه يفتح النت بس و يخت الاعراض مع بعض ، و يطلع بالنتيجه الصاح !
طيب أنا هسي عايز شنو يعني ؟
في الأول خلوني أقول ما عايز شنو
– ما عايزكم تردموني ! عليكم الله ما تردموني
ولا تضحكوا في كلامي و تسمعوني كلام يزعلني و يتعبني شديد ، انا تعبت بما فيه الكفايه صاح
– ماعايزكم تظنوا اني ببوظ سمعتكم او بحقد عليكم .
– ما يجيكم احساس عشان انا صيدله بغير منكم و بحقد عليكم و عايز أطلعكم غلط ، لانه انا ذاتو الصيدلة ماشفت ليها شئ ،أنا يادوب خلصت اولى و ماشي تانيه . .
العايزه شنو ودا المهم :
– قصتي قدامك و مع اني اختصرتها شديد ، عليك الله أطلع منها بحاجة و لو بسيطة و كلم بيها معاك زمايلك
– خلوا المجال الطبي مكان أحسن ، جودوا شغلكم ، طوروا معرفتكم ، اقروا كتير ، اتدربوا صاح ،اجتهدوا
استعيدوا ثقة العيانين فيكم ، العيان و اهلوا ما بكرهوكم و لا شايلين منكم ، بالعكس بسلموكم روحهم عديل ، وبس عايزين منكم إهتمام و تعاطف و قلب حار و جدية و إبتسامه و إنسانيه و كلمة طيبة و تشخيص صاح وعلاج صاح و العافيه دي من ربنا أصلو ما بجيبها زول
– طب صيدلة أسنان مختبرات أشعة تخدير تمريض اتوحدوا و اتعاونوا حسوا دائماً بأهمية بعض ، ماف زول أحسن من التاني المشاكل و المطاعنات و الحزازات خلوها . .
– البيئه الظروف الإمكانيات انحنا ذاتنا ما بشر وزير الصحه
انسوها دي شماعات ساي والله و اذا باريناها عمرنا ما نتقدم
انا محمدالمجتبى 24 سنه ، صيدلة المستوى التاني زي ما شفتوا قصتي فيها حاجات كتيرة تتحكي ، و قصتي مع المرض لسا ما انتهت لانه مزمن ، ومن وقت للتاني بتعرض لهجمه وكل الامور بتجوط لكن مواصل حياتي و دخلت المجال الطبي بعد صراع و تحنيس لإدارات الجامعات و النجاح براه بالنسبه لي ماكان كفايه عشان يقبلوني . .
ممتن شديد و بشكر ربنا على نعمة وجودي في المجال العظيم دا و بستغرب كيف في ناس ما مقدرين انهم بإذن الله ربحانين دنيا وآخره.
بقيت ناشط اجتماعي و متابعني كتار و أحلامي كتيرة أولها أكون باحث طبي و نساعد في أنه نصلح الطب و نلاقي لكل مرض و كل مريض أحسن علاج و ماف عيان تاني يمر بالمريت بي أنا . . باقي الاحلام انتوا عارفنها
اخر حاجه : عليكم الله ما تزعلوا مني طيب ، و اعتبروني صديق و نيتي سليمه و خلو تعليقاتكم ظريفه ( خايف والله اكضب عليكم )
و متردد شديد انشر و اكتب هسي ولا لسا
و مستحيل اكتبه و انشره برا القروب الطبي دا
، لكن العمر ما معروف . .
الخرطوم (كوش نيوز)