حوارات

نجمة قناة امدرمان عزيزة عوض الكريم : هذا هو سبب إستقالتي

 

 

لهذا السبب قدمت استقالتي مؤخراً : وملاذ خوجلي صعب التعامل معها

قناة الخرطوم كان اسوأ قرار في حياتي وهذا يخلق الضغينة بين المذيعين .

لم اندم علي ذلك واللقو اسمي بين الزملاء : لذلك ساختارالاحترام

 

درست علم النفس وعملت به ولرغبتها الكبيرة وموهبتها التي صقلتها بالتدريب والعمل اتجهت الي مجال الاعلام ظناً منها ان لديها الكثير لتوصيله للمجتمع وتحكي ان علم النفس والاعلام سيان لايختلفان كثيراً

عملت بقناة الخرطوم ولاسباب سنطلع عليها داخل الحوار تم فصلها واتجهت الي قناة امدرمان الفضائية وهي من المؤسسين لها حتي اطلق عليها زملائها (اللوقو) . . المذيعة عزيزة عوض الكريم هاهي تقدم استقالتها بصورة مفاجئة من تلك القناة بعد ان اصبحت النجمه الاولي بها فقدمت كل انواع البرامج وهي نموذج للمذيع الشامل وبابتسامه لاتفارقها التقينا بها وخرجنا بتلك الدردشة .

 

في البدايه حدثينا عنعزيزة فقط ؟

اولا اهلا بيك وحبابك عشرة

انا عزيزة عوض الكريم زولة بسيطة جدا متزوجة وام الحمدلله .. تخرجت من علم نفس    جامعة النيلين وعملت في نفس مجالي فترة متنقلة بين المراكز والعيادات .

 

ما السبب الذي ساق عزيزة لمجال الاعلام ؟ ومالعلاقة بين الاعلام وعلم النفس ؟

اما عن سؤالك عن سبب انتقالي للعمل في الاعلام .. مجال علم النفس من اقرب المجالات للاعلام لأنو بخليك تعرفي سايكولوجية الضيف والمشاهد وبالذات لو المذيع متخصص في البرامج الاجتماعية فبيكون قريب من الناس والتعامل معاهم .

 

انتي قليلة الظهور في الصحف لماذا ؟

انا كتاب مفتوح للناس وبيعرفو عني كل صغيرة وكبيرة ومع الناس في الفيس والواتس عندي رقم للمشاهدين بس خاص بيهم وكمان المسنجر برد علي استفساراتهم .. يعني بفتكر انو معرفة الناس بي .. مافي حواجز او جريدة تنقل اخباري ليهم .. انا اصلا عبارة عن جريدة متاحة لكل الناس وممكن تقراها .

 

قناة امدرمان شعارها الحرية والجمال . لكن داخلها كبت للحريات ما رايك ؟

قناة امدرمان شعارها الحرية والجمال والاسم علي مسمى وكان عندنا فيها مطلق الحرية وكل الجمال ماكان في زول بيتحكم في حريتنا وبنتكلم في كل المسكوت عنو والمشاهد شايف وعارف .

 

مايدور خارج تلك المؤسسة انها تظلم موظفيها في العائد المادي ماقولك ؟

هو البقولو الناس شوية ؟؟ العائد المادي ده بيكون متفق عليه اول ماتدخل المؤسسة وبيكون بموافقة الطرفين والمؤسسة بتلتزم بعد كدة بالمرتب .

 

ملاذ خوجلي اسم  يقال انه صعب التعامل معه وهو سبب في هروب بعض المذيعين الي قنوات اخري ؟

استاذة ملاذ فعلا صعب التعامل معها وفهمها وده امكن لطبيعة شخصيتها . اما عن انها سبب هروب بعض المذيعين الكلام ده سمعتو زيي وزي غيري مافي شئ مؤكد .لكن شخصيا علاقتي معاها عادية جدا وفكرت فعلا مرة في الذهاب بسببها .

مؤخراً قدمتي استقالتك من قناة امدرمان ما السبب وراء ذلك القرار ؟

انا فعلا قدمت استقالتي رسميا من قناة امدرمان .. بس بحتفظ بالاسباب لنفسي لأنو قناة امدرمان دي عشقي الاول مابقدر اتكلم فيها  ومافي شخص غلط في حقي وجدت منهم كل الاحترام بالذات من الاستاذ حسين خوجلي واستاذ عصام الدين الصائغ مدير البرامج .

 

هل تعتقدين هذا القرار صائب ؟

اعتقد انو القرار صائب لأنو اصلا الواحد لمن يوصل لقرار زي الاستقالة وافتكر انو قرار صعب معناها في اسباب قوية خلتني اقرر القرار ده . وكمان بعد سبعة سنة من العمل باخلاص وتفاني .. يعني عشرة سنين وكنت من المؤسسين للقناة وقبل التردد حتي .. وبعض الزملاء مسمني اللوقو ههههههه .

 

القنوات داخلها تعامل المذيعن بالخيار والفقوس وليس بالخبرة والامكانيات ؟

ماكل القنوات بتعامل المذيعين بالخيار والفقوس لالا ابدا في قنوات عادلة وتتعامل بمبدأ التساوي بين المذيعين . لكن طبعا في القليل المابيعتمدو علي الامكانيات والخبرة .. وممكن زي ماقلتي تلقي بعض القنوات في داخلها تميز بين مذيعنها وده البيخلق الاختلاف وامكن الضغينة بين المذيعين .

 

هل كانت امدرمان خصم ام اضافة لمسيرتك الاعلامية ؟

امدرمان كانت اضافة حقيقية لي .. عمري ماندمت ولا لحظة اني كنت شغالة فيها ..

 

ماذا بعد الاستقاله ؟ وهل هناك عروض داخليه او خارجيه ؟

حا استجم شوية في البيت اراجع حساباتي عملت شنو وحااعمل شنو . بديت اجراءات دراسة الماستر في مجال مختلف . اما بالنسبة للعروض . للان مافي عرض جادي لا داخلي ولا خارجي .

 

ماهو افضل قرار اتخذته عزيزة في حياتها المهنيه وماهو الاسوأ ؟

افضل قرار اتخذتو مهنيا هو تغيير مجال علم النفس للاعلام لأنو كدة قدرت انشر رسالتي عبر نطاق اوسع .. اما عن اسوأ قرار مهني هو قبل كدة بديت العمل بقناة الخرطوم الفضائية في فترة خاطئة .. لكن كانت تجربة لابد منها واتعلمت منها كتير واتعرفت فيها علي اجمل ناس منهم استاذة يسرية محمد الحسن والدكتور الراااائع عمر الجزلي واستاذ زهير بانقا وكل الزملاء المذيعين . يعني حتي اسوأ قرار استفدت منو

 

لماذا كان الاسوأ هل لانه تم فصلك بسبب الحجاب كما يقال ام هناك اسباب اخري ؟

الله يرحمها نادية عثمان كانت اجرت معاي حوار قبل سنوات عديدة عن نفس الموضوع وكان رأي الشخصي انو كان السبب الحجاب ودي كانت سياسة القناة كدة بس الفصل مااتوضح السبب وماكنت براي كنا مجموعة .

 

هل انتي راضية عن ماقدمتيه حتي الان ؟

انا راضية كل الرضا عما قدمته للان الحمدلله ومقتنعة انو كل مرحلة من حياتي عندي رسالة لازم اقدما للناس .. والحمدلله الرضا ده بيظهر في وش الزول

 

ماذا تطلب عزيزة اولاً عندما تختارها قناة جديدة المال . الاحترام عزة نفسها .اشياء اخري ؟

سؤال جميل .. بطلب في القناة الجديدة الاحترام والتقدير والتقييم ..

 

هل سبب انفعالك مع السؤال انك كنتي فاقداهم في قناة امدرمان ؟

ابدا ماكنت فاقداهم في امدرمان ..بس خطأ شخص ماممكن احكم بيهو علي الاخرين .

 

اخيراً ماذا انتي قائله لكل زملائك ؟

رسالة لزملائي عامة .. لازم تقدمو رسالتكم كاملة وتخدمو الناس بكل قوتكم .. اقيفو مع بعض .. اعملو اتحاد او كيان خاص بالمذيعين عشان نقيف مع بعض وعشان حقوقنا ما تضيغ

ورسالة لزملائي بقناة امدرمان في كل الاقسام .. انا بحبكم شديد واصلو  تقديم الرسالة السامية البديناها سوا كونو دائما بخير.

 

حاورتها: نسرين الحكيم

الخرطوم (الدار)

اضغط هنا للانضمام لقروبات كوش نيوز على واتساب

قروبات كوش نيوز الإضافية



زر الذهاب إلى الأعلى