مذيعة النيل الأزرق إسراء سليمان في حوار ساخن : ملابسي في (زول) كانت أوفر شوية ..

مذيعة النيل الأزرق إسراء سليمان في حوار ساخن : ملابسي في (زول) كانت أوفر شوية ..


 

هذا  ردي على من يقول إن بنات النيل الأزرق (متشابهات)

مذيعة شابة بمواصفات نجمة حققت نجاحاً وشهرة ملحوظة وهي لا تزال طالبة جامعية ، إقترن إسمها بإثارة الجدل .. إسراء سليمان في حوار البوح والصراحة الذي تعهدت فيه أن تفتح قلبها للقارئ .. فإلى مضابط الحوار :

 

* بعد عشرة أعوام في النيل الأزرق .. ما الذي تغير فيك ؟

– تسعة يا ملاذ ياخ ما عشرة طبعاً بتذكر لحدي الليلة يوم كنت طالبة في سنة أولى وقالوا لي الليلة في معاينات في قناة النيل الأزرق وقدمت وأخدوني وطبعاً الواحد بكتسب خبرات وبيتعلم ويتطور يوم عن يوم .

 

 

لقبت قديماً بـ(همر) الجامعة الأهلية .. ما سر التسمية ؟

– (ضاحكة) .. ربما لظهوري على الشاشة مع ظهور العربية الهمر في ذلك الوقت وحقيقة ما عارفة سبب التسمية الأساسي .

 

* أنت من أكثر المذيعات ظهوراً على الشاشة هل إستفدت من فرص الإطلالة الكثيره ؟

– طبعاً إستفدت كثير لإختلاف البرامج وتنوعها وطورت من نفسي ثقافياً ، وعرفت جوانب العمل التلفزيوني ومتطلباته لعملي في كل القوالب .

 

* بعد كل تلك السنوات ألم تشعري بالملل من مساء جديد؟

– أبداً .. بحس في كل حلقة إني في برنامج جديد خاصة أنو تيم (مساء جديد) نتناقش وبنفكر مع بعض وبنخت خطط وأفكار ، ونحن بنسعى وكل تيم بيسعى في إنو نقدم شيء مختلف يرضي الناس .

 

* أنت مخيرة ولا مسيره ؟

– في مرونة في المكان عشان كدا بحس نفسي مرتاحة في البرامج البقدم فيها .

 

* عموماً هل ترين أن هنالك قيوداً مفروضة على الإعلام في السودان ؟

– خليني أتكلم عن النيل الازرق والأنا شايفة إنو طابعها الإيقاع السريع والخفيف والبخليك تظهر على طبيعتك بدون قيود ، ودا البخليها قناة معينة على الإبداع وبتحسيها ما زي باقي القنوات .

 

* تجربتك في قناة زول ماذا عنها ؟

– كانت بعد عملي في النيل الأزرق بعامين وحسيت إنها تجربة مختلفة ممكن تساعد في تحقيق حلم من أحلامي والفرصة كانت في إننا نعد ونقدم في نفس الوقت ، ولكن لم أستطع العيش خارج السودان فعدت إلى قواعدي سالمة .

 

* ما زالت صورك بالبنطلون في فترة عملك في (زول) منتشرة عبر الأسافير لو أعيدت التجربة هل سترتدين نفس الملابس ؟

– في مذيعات على الرغم من إلتزامهن إلا أنهن يخضعن لسياسه القناة التي يعملن بها .

* اللبس حرية شخصية ولا يمثل تربية وإلتزاماً لكن السؤال هل ‘سراء الأمس هي إسراء اليوم في اللبس ؟

– اليوم بحس لبسي في زول كان شوية أوفر لكن لبست برضو بدل وكاجوال عادي وتوب سوداني كتير وغيروا .

 

* أناقتك الملفتة للأنظار والمختلفة عن الجميع من خلفها ذوق عالي ؟

– أتابع بيوت الأزياء العالمية والعربية ، وبحب الموضة والأزياء جداً والمظهر والهندام مهم جداً للمذيع ، وما مجرد شيء ثانوي .

 

* كيف تستعدين للبرامج التي تقديمينها ؟

– عندنا قروب لأي برنامج بتناقش وبنحاور في الضيوف والمحاور ، وبذاكر عن الشخصية الما بعرفها ومرات في مواقف المفروض نتعامل معاها بحنكتك وخبرتك زي ممكن تكون عارف الضيف ومجهز محاورو و يتغير في نفس اليوم .

 

* بعد كل هذه السنوات لماذا لا تملكين برنامجاً خاصاً ؟

– الإنتاج هو العقبة الوحيدة ، قبل فترة بديت برنامج أسمو (همس المساء) ووقف لعوائق مادية وإن شاء الله نفسي أعمل برنامج حواري إجتماعي بشكل مختلف يتحدث عن القضايا المجتمعية المسكوت عنها .

 

* إتهام الزرقاء بأنها تضم الجميلات على حساب الثقافة والإلمام المعرفي .. ما رأيك ؟

– هو عليك الله الزمن ده في بت شينة ؟ مع إني بسمع الإتهام دا حتى في ناس بقولوا نحن بنتشابه مع إني ما شايفه في وحدة بتشبه الثانية وفي النهاية الشكل الجميل مطلوب ، وإن كان الجمال لوحده طبعاً ما كفاية فمذيعات الزرقاء يمتلكن الجمال والثقافة والإلمام المعرفي .

 

* تفتكري ليه قناة النيل الأزرق هي القناة الوحيدة التي تصنع نجومية المذيع على الرغم من توفر الإمكانيات الأكبر في القنوات الأخرى ؟

– دي حاجة إنطبعت في ذهن المشاهد لأنها قناة المنوعات الأولى ، وهي صاحبة الدهشة الأولى للمشاهد السوداني .

 

* هل أنت مدللة في النيل الازرق ؟

– طبعاً لا .

 

* ولماذا هذا الرد القاطع ؟

– لأنو دي النيل الازرق وسياسة النيل الازرق .. وما لا يعلمه الكثيرون أننا في أوقات العمل نتعرض لضغط كبير ، ووقت العمل للعمل ، وممكن عادي زول (يكورك) فيك وفي ضغط كبير عشان يكون نتاجو الشغل الكبير البشوفوا الناس .. ولكن بالمقابل مافي زول بخت في نفسو حاجة لأنو  عارفين نحن بنعمل في شنو وليه ، ونحن من زمان متعودين إنو مافي زول بقول ليك إنت كنت كويس عشان دايماً تحس إنو إنت عندك الأحسن وممكن تقدم الأفضل وتحاول تثبت إنك كويس .

 

* من هي نجمة النيل الازرق حالياً ؟

– ما بقدر أقيم أو أحدد ، المشاهد هو الأجدر بالتقييم .

 

* مع من مِن زملائك تجدين نفسك في العمل ؟

– كلهم بلا إستثناء .

 

* أحرجك متصل على الهواء في الـ(BN.FM) وطالب بالإبتسام في وجه المشاهدين صباحاً ؟

– ما عندي مشكلة والله ، وأحكي ليك موقف تاني كمان .. مرة كنا في عيد الضحية وفي زول اتصل قال لي يا إسراء عازمك هسه شية وقمت أنا قلت ليه والله حالياً ما عندي طريقة فإنتو إستمتعوا بالشية وبالعيد ، فقام قال لي على فكرة إنت ما من حقك تقولي لينا كده وإنت مذيعة ومعروفة مفروض تكوني ظريفة وتقبلي الدعوة ، ولحد الآن موجودة في (يوتيوب) بعنوان “متصل يحرج مذيعة النيل الأزرق” .

 

* خفة الدم الكبيرة وروح الدعابة التي تملكينها لماذا لا يعرفها الناس ويتهمونك بالتعالي ؟

– الناس بتحكم بالظاهر ويمكن عشان أنا برفع حاجبي دايماً ، دا بديني مظهر حاد وهو ما حقيقي بالمرة ودايماً الناس بتقول لي ما كنا قايلنك كدا .

 

* تتعاملين مع النقد بمنتهى البرود .. لماذا ؟

– أبداً والله ، ولكن بطبعي لا أميل للتهاتر وإن كنت بقرأ النقد وبحاول الإستفادة منو بقدر الإمكان .. ولو لم أكن موجودة ولفت النظر لما تم إنتقادي .. وأحترم أي نقد ما شخصي .

 

* هل يؤلمك النقد الشخصي ؟

– تجاوزت مرحلة الألم دي منذ زمن وإن كنت أشعر أحياناً بأنني السبب في جعل حياتي مستباحة للقيل والقال ، فالعمل العام يعرضك لمثل هذه الأمور ولكن زي ما بقولوا يا (غرق يا جيت حازمها) ، وبعد ده خلاص دا درب أنا مشيتو ولازم أكمل وما أتهزم وأواصل مشواري البديتو .

 

* أنت قوية ؟

– بعتبر نفسي قوية ومع نفسي  وجواي شديد وحتى على حساب نفسي ، ودي ممكن تفلسفيها براك .

 

* قصدك ضعفك ما بظهر إلا قدام نفسك ؟

– يعني قوة من كترتها لما بحن على نفسي .

 

* الضعف شيء طبيعي في الإنسان .. متى تضعفين ؟

عند الصدمات وإن كنت لا أظهره ولا حتى أمام أقرب الأقربين .

 

* هل ترين في إظهار ضعفك هزيمة ؟

– شوفي يا ملاذ أنا زولة قوتني الصدمات ودا ما كلام إنشائي ساي للحوار ، دي حقيقة ، وبقيت ما بحب الهزيمة ولا طعمها .

 

* عقوبات الإيقاف هل تؤثر فيك ؟

– دا دليل على إنو القنوات ما بتدلل المذيعين وبحترم كافة القرارات جداً ، وممكن تقولي إني مشاغبة بعض الشيء لكن في النهاية بحترم أخطائي .

 

* قبل فترة رفضت الخروج من الإستديو بعد أن إعتذرت عن تقديم الحلقة .. ما الذي حدث ؟

– أولا أنا ما إعتذرت .. ثانياً الحصل إنو أنا كنت مكلفة أشتغل الـ(FM) يوم الأربعاء حسب الجدول الجديد ، وفي الأول كنت معترضة لأني شغالة مساء جديد يوم الثلاثاء فوجدت الناس بتتكلم عن إنو انتو جيتو مذيعين ليه ؟ وأنا ما فاهمة شيء فقلت ليهم أنا مافي زول أخطرني إني ما شغالة ، وعن نفسي أنا شغالة ومنى الطيب برضو شغالة حسب جدولها القديم فإشتغلنا مع بعض .

 

* تحديت إدارتك برفضك الخروج من الإستديو ؟

– إدارة النيل الأزرق دي ما الإدارة البتحدوها وإنت عارفة كدا ، وكيف ممكن أتحدى إدارتي وأنا لسة موجودة في القناة وشغالة عادي ولا حتى إتعاقبت .. وده الحصل بالضبط .

 

إستماعك وحبك لأغاني الجابري ونهى عجاج لماذا هما بالذات عن إختلاف تجربتيهما ؟

– لأني أحب الأغاني الحزينة والطويلة وإن كنت بسمع الشباب ومختلف الأنماط الموسيقية ، فمثلاً كمان أنا بعشق أبو عركي ، ويمكن لأني بميل للرمزية وما بحب الغناء الواضح التفسيرو ساهل .

 

* كل الشائعات حول إسراء مرتبطة بالزواج والحب .. لماذا ؟

– بعتبر ده شيء طبيعي ومرات بتفاجأ بحاجات أكبر .. مرة قالوا أنا متزوجة وعندي ولد .. ده شيء طبيعي ما بستغرب فيه .

 

* ما هو البرنامج الذي تحلمين بتقديمه ؟

– (المتاهة) لـ”وفاء كيلاني” نفسي أعمل حاجة زي دي .

 

* إسراء الشاعرة أين هي ؟

– بخجل إني أنشر كتاباتي ، وحالياً واقفة لكن ح أرجع أن شاء الله .

 

* شكراً إسراء ؟

شكراً للمجهر .. وحقيقة حوار ممتع جداً ما حسيت بالزمن .. نتلاقى في براحات أخرى .. شكراً ليكم .

 

حوار: ملاذ ناجي

الخرطوم (المجهر)

اضغط هنا للانضمام لقروبات كوش نيوز على واتساب




اترك رد