ناهد قرناص

سلام الجماعة

الطرفة المعروفة عن ذلك الطالب الذي ارسل صديقه لمعرفة نتيجته ..اوصى صديقه قائلا (لو لقيتني ساقط في مادة ..رسل لي رسالة مكتوب فيها صاحبك خالد بسلم عليك ..لو مادتين اكتب لي خالد وعمر بسلموا عليك )..جلس مترقبا النتيجة..اتته الرسالة التالية (الجماعة كلهم بسلموا عليك)..سقوط مدوي في كل المواد ..والنتيجة ..صفر كبير .

يبدو ان الجماعة كلهم ارسلوا تحياتهم الى شخصي الضعيف ..اذ تراكمت النصال على النصال ..والفساد طال كل الجبهات ..وما عرفنا (نقبل وين ونحكي الوجعة ) ..كنت اود الكتابة عن تلك الكميات المهولة من الذهب التي جرى احباط تهريبها .وقبل ان ابدأ في الكتابة ..جانا الخبر شايلو النسيم بقصة تلك الدولارات المخزنة..وقبل ان افيق من هول الصدمة فاذا الوسائط تتحدث عن قضية اخرى من قضايا الفساد التي تطال احد المتنفذين في الدولة ..ويبدو ان الساقية لسه مدورة ..

بالامس توقفت لشراء رغيف من مخبز مجاور لمنزلي ..قلت مازحة للفتى الذي ناولني الخبز (مالو العيش بتاعكم شوية الليلة ) …وكأنه كان في انتظاري ..انفجر في وجهي قائلا (انتي قاعدة وين يا استاذة ..العيش دا كان مافي عديل ..الناس واقفة صفوف ..احمدي الله انتي لقيت ليك عيش ..والله كان جيتي قبيل.. مافي زول كان شافك من الزحمة ) ..الجماعة شكلهم سلموا على ناس كتار ..ما براي يعني ..هدأ قليلا (بعد ما فش غبينتو) ثم سألني (عايزة كيس ولا معاك حاجة تشيلي فيها؟) ..هممت ان امازحه قائلة (اشيل في خاطري ) لكني تراجعت بسرعة .يعني خاطري يشيل شنو ولا شنو ؟..والفتى يبدو عليه ان (الفيهو مكفيهو) وما عارف يلقاها من وين ولا وين ..

لذلك نود لفت الانتباه الى ان الاخبار ..التي تاتي على شاكلة القاء القبض على فلان ..او احباط تهريب دهب علان ..لن (تحلنا) من سلام الجماعة ..اذ لا أثر لها على أرض الواقع ..لا زالت المناظر هي ذاتها والصور نفس المشاهد ..فالغلاء يمد لسانه ساخرا ..والتضخم (باع فينا واشترى) ..والدولار (كان شالوهو ما بنشال ..وكان خلوهو مسك الدار ).. اخبار مثل هذه تعتبر دعاية واعلان تماما مثل تلك التي نشاهدها على الفضائيات ..حاجات تحدث بعيدا عنا ..فيلم نشاهده ونصفق للاخراج المتقن ..ومن ثم (نتحزم ونتلزم ونقعد في الواطة ) لنحسب ثمن كيلو الطماطم وربع البصل ..ورسوم المدرسة وسندوتش الفطور

غير انه لا يفوتنا ان نقول رأينا في الاحداث ..ونذكر بان محاربة الفساد لا تتفق مع التكتم ..وفقه السترة ..اذ لا يجدي ان نقرا عن احباط تهريب ذهب ..دون ان يفضح فاعله ..او نقرأ عن مخدرات تدخل البلاد دون ان نعرف من الذي تجرأ وفعل ذلك ..افضحوهم في كل مكان ..علقوا اسماؤهم على الجدران ..ارفعوا صورهم على قوائم الأعمدة ..وفي كل مرتفع ومنخفض ومنعطف وشارع ..اقعدوا لهم كل مرصد ..واشفوا صدور قوم مؤمنين ..
..او بالاحرى ..ارحمونا من اعلانات القبض على فلان ..او احباط عملية علان .. دون ان تحدث محاكمة ..او عقوبة فعلية ..او ابعاد فوري من الوظيفة ..اما هذا ..وللا سيبونا في حالنا … وخلوا الجماعة كلهم يسلموا علينا ..

اضغط هنا للانضمام لقروبات كوش نيوز على واتساب

قروبات كوش نيوز الإضافية



زر الذهاب إلى الأعلى