أسامة جنكيز يكشف أسباب انفصاله من تيراب : تعرضنا لـ ” التهميش” من الفرقة
جدل واسع وكبير أثاره خبر مغادرة الثنائي الكوميدي أسامة جنكيز وذاكر سعيد لفرقة تيراب الكوميديا وذلك عقب خلاف اندلع بينهما وإدارتها.
- بداية .. فصلوكم ليه؟
نحنا (انفصلنا) من الفرقة، ولم يتم فصلنا، ودي معلومة لازم كل الناس تعرفها، وأنا وذاكر ما برانا الإنفصلنا، معانا كمان الكوميديان ود الجاك.
- طيب (انفصلتو) ليه؟
الفرقة كانت بتعمل بروفات مستمرة حالياً لها ما يقارب الثلاث سنوات وابتعدت عن البروفات، مما أدى لتراجع جودة المنتج الذي يقدم للجمهور، بالإضافة إلى أن مدير الفرقة نفسه لا يشعر بما يحدث فهو بصريح العبارة مهمته تحصيل الأموال وتقسيم العدادات على الأعضاء، أما نحن فنعاني أيما معاناة من الجمهور والذي صار يسخر منا مؤخراً، ويقول لنا وبصريح العبارة في أكثر من محفل : ( يا خي العرض دا ما قدمتوهو لينا السنة الفاتت ليه بتعيدوهو تاني .. مافي جديد) وهو أمر محرج جداً نتعرض له.
- لكن كلام مدير الفرقة كان واضحاً جداً وقال إنكم تمردتم على الفرقة؟
يا اخي أديك سر .. الفرقة هي المتمردة علينا والدليل إن الفرقة ما بتطلبنا في أي عمل طوال السنة، يعني بالضبط 11 شهر نحن بنكون ما شغالين لكن لما يجي رمضان طوالي بضربوا لينا عشان نشتغل، ودي حاجة بالجد مزعلانا شديد.
- كيف الكلام دا ؟ انتو نجوم ولكم أسماءكم كيف تتجاوزكم الفرقة؟
شوف .. الفرقة دي فيها ناس نحن مسمنهم (التكالات) وديل بسفروهم الولايات وبشتغلوا الشغل بتاعنا، لما يجي رمضان غزالي برفع سماعة تلفونه ويضرب لينا، بدون مايسأل نفسو ليه نحن 11 شهر ما شغال بينا ويجي بس في موسم رمضان يتذكرنا.
- برضو ما جاوبت على سؤالي ليه التجاوز لنجوم كبار زيكم؟
صراحة غزالي مدير الفرقة عنده سياسة شغال بيها في الفرقة، وهي بهتم أكتر بـ”الزول” البجيب عروض، مثلا تجيب عرض بـ “250” مليون حيركز معاك ويخليك تشارك في العروض ، أما لو ما جبت عرض ممكن يتجاوزك عادي جداً، والدليل أنا في أحد المواسم جبت عروض كبيرة لغزالي وكنت قريب منو جداً وأساسي قبل الباقين، وفي موسم تاني ماجبت عرض ما اشتغل بي نهائي.
- يا جنكيز سياسة مدير الفرقة ممكن تكون سياسة تشجيعية وتحفيزية للأعضاء لجلب العروض ليس إلا، لكن السبب الرئيسي لمغادرتكم الفرقة حسب معلومتنا أنكم قررتم في رمضان الماضي المشاركة لوحدكما في خيمة رمضانية دون الرجوع للفرقة أو الاستئذان منها؟
صاح نحن اشتغلنا برانا في رمضان الماضي ودا سبب التهميش الحاصل لينا، وبعد ما اشتغلنا مدير الفرقة طلب مننا نجيب القروش الاشتغلناها لخزينة الفرقة ونشيل عداداتنا عادي زي كل سنة ونحنا رفضنا الكلام دا لأنو ما عادل.
- لكن إنتو رسمياً منتمين للفرقة؟
صاح ونحنا عشان القصة دي قررنا نغادر مع كل الود والتقدير.
- جنكيز انت زعلان شديد؟
لازم أزعل .. لأنو الماسكين الفرقة ومؤسسيها هم المستفيدين منها ونحنا البنمثل ما مستفيدين أي حاجة.
- بعد المغادرة حتعملوا فرقة جديدة؟
نعم نحن حالياً في إطار تكوين فرقة جديدة وحيكون معانا محمد عبد الله ومختار بخيت وحنسعي عبر الفرقة الجديدة نطور استايل الكوميديا ونمشي بيهو لي قدام.
- وهل الاسم حيكون (تيراب2) زي ما سمعنا؟
لا طبعاً الاسم حنجتهد نحضر لي اسم جديد ونقدر بنجوميتنا وأسامينا نلقي اسم جميل ورنان.
- بعد مغادرتكم الفرقة جاتكم عروض من فرق كوميدية تانية؟
عبر المساحة دي خلوني أشكر علي حسين مدير فرقة همبريب ونحن أصلا أولادو أنا وذاكر لأننا طلعنا من همبريب وجينا تيراب وعلي حسين قال لينا: (مكتبي وفرقتي مفتوحة ليكم لحدي ما تتحل مشكلتكم)، ودي حاجة محزنة بالجد، يعني فرقة همبريب تفتح لينا الباب وناس تيراب يقفلوها في وشنا، مش كدا وبس أنا عرفت كمان إدارة الفرقة حلفت كل الأعضاء قسم أنهم ما يشتغلوا مع أسامة جنكيز وذاكر سعيد في أي مناسبة أو مسرح، وأديك سر أنا الفرقة دي قبل 4 أو 5 سنة مفترض أغادرها لكن الخوة والعلاقات الاجتماعية البين الناس خلتني أقعد، لكن الأمور لما زادت عن حدها اخترت المغادرة، والرزق بيد الله.
- أخيراً عرفوكم الناس بجنكيز تيراب وذاكر تيراب حتطلعوا من القصة دي كيف؟
صاح بنادونا بذلك، والحاجة دي ما كعبة بالنسبة لينا بالعكس بنفتخر بيها، لان تيراب اتعلمنا منها الكثير، بس كمان ما بنقدر نتعايش مع التهميش ولا الظلم عشان كدا اخترنا نبقى مارقين.
أجراه (صحيفة السوداني)