كوش نيوز تتحصل على اخر رسالة صوتية للاعلامية الراحلة دكتورة عفاف الصادق

تحصلت كوش نيوز على تسجيل صوتي للمرحومة الاعلامية دكتورة عفاف الصادق التي توفيت صباح اليوم السبت قالت لدكتور عوض ابراهيم عوض في رد على رسالته لها .
السودان والسودانيين ما بستاهلوا الشي البحصل ليهم واضافت الحمد لله نتمنى ربنا يعوضهم صبرهم ويفتح علينا وعليهم بالأشياء الجميلة واضافت عفاف ياعوض قلبي بقول لي اقول ليك الليلة ستف شنطتك وانا كمان و نخلي ورانا اي حاجة نمشي نعمل لينا اذاعة فيها كل الناس الجميلين ونقعد بس للاذاعة وصراحة (دي حتتنا) الحقيقية وكلامك عن نيلوفر كان جميل جدا ورسلتها لعركي ونيلي والأصدقاء وخسارة كبيرة انك تكون بره السودان وانت من الكفاءات الواحد بحزن بان البلد محتاجه ليهم لكن كمان امرين احلاهم مر في حاجات مهمة في حياة الانسان . وتمنت الرحمة للسودان واشارت عفاف تذكرت حاجات جميلة منها اغنية ( اقيفي ارجيني ياريدتي ) واتذكرت انا في المعهد وعركي بندرس في المعهد هو في قسم الموسيقى وانا في قسم الدراما وانا جايه من الموسيقى ماشه الدراما كانوا متواجهين بعض .
قام عركي جاي من وراي وانا ماشه المحاضرة سريع لانه بدأت فقام قال لي عفاف اقيفي ارجيني اقيفي ارجيني فجاة وقف انا استدرته اشوفه لقيته واقف وواضع يده على راسه قال لي اقيفي ارجيني دي ذكرتني اغنية كان اداني ليها شاعر بعنوان ( اقيفي ارجيني يا ريدتي ) والاغنية عجبتني شديد وقمت بوضعها على الدولاب ونسيتها ومر عليها زمن وماعارف شاعرها مين ومشى نزل خبر في الجرائد قال انا عندي اغنية وببحث عن الشاعر حقها وكان عبد العال السيد وهي بتقول( اقيفي ارجيني ياريدتي عشان البس صيدرتي واشيل يازوله مخلايتي ونسري الليل نتمشى وفوق الرمله نتعشى ونتكالم
وننسى متاعب العالم ونبعد عن مشاكلنا وتتبدد مشاغلنا واحسك جوه في الاعماق وفي ترنيمة العشاق واغنيك غنوة في الاسواق اقول ليهم حبيبتي هديك عاينوها حبيبتي الما بدسوها مشيت وديتها لي امي ومشت ودتني لي ابوها دي العليها ما بوصوني وعلي ما بوصوها اقيفي ارجيني يرضى عليك عشان البس صديرتي واجيك واقيفي ارجيني يا ريدتي ) انا الان بقول فيها من راسي في بعض كلمات تكون ضاعت مني .
واتخيلت الايام المنظر والأيام الجميلة وتسجيلك مع عركي ومعانا الفنيين والمخرجيين الحمد لله رب العالمين عشنا ايام حلوة وربنا ان شاء الله يعيدها
واستعرضت دكتوره عفاف القصيدة التي قامات بتالفيها ردا على اغنية( اقيفي ارجيني ياريدتي) بهذه القصيدة الرائعة ( حبيبي غنى ولي قال اقيفي ارجيني يا ريدتي عشان البس صديرتي واشيل ازوله مخلاتي ونسري الليل ونتمشى وفوق الرمله نتعشى ونتكالم وننسى متاعب العالم تقول جاييك اقول راجياك اللملم كل سعادة الدنيا واترجاك وقلبي بمده عشان يلقاك وعايزه اكون صدرك ليك ديمه حنون يشيل منك عناك الفات ويزيل عنك تعب سنوات اياكا بقيت عشى الباياتات ودايره اكون ليك العين وليك الايد وأبقى الفرحه ليك والعيد وماني بلاك ولا العمر القضيته زمان صبح من عمري يوم معدود ياداب انا بيك بقيت مولود واشيلك لي نور ضواي نور قدامي بضوي وراي واقول للدنيا قال لي جاي لملمي كل الفرح الفيك وجيبي حداي والبسي ليك توبا سار وشوفي ليك أحلى مسار شمسك تشرق بالانوار وقمرك يضوي ويملأ الدار وبترجاك بشوقا حار بتحرى جيتك ليل ونهار )
عمر الشيخ
الخرطوم ( كوش نيوز )