أمه تستنجد بقروب وصافين .. حساسية في صلعة طفل تجلب العديد من الوصفات البديلة

إستنجدت احدى الأمهات في قروب (وصف لي ) بالفيس بوك بالأعضاء عبر رسالة دونتها بلغتها العامية مصحوبة بصورة لأبنها وجدت تجاوباً وتفاعلاً كبيراً بين المشاركين لمنشورها حيث جاءت الرسالة حسب مدونتها: (ياجماعت الخير السلام عليكم عندي ولدي وديتو الحلاق،بعد يومين تفاجات عندو حبوب قوية في الرأس جربنا فيها كل شي واسي انقلبت لي حساسية رؤسها بيضاء أرجو المساعدة)
وجاءت الردود والتعليقات وكل منهم أدلى برأيه في ذلك ردود منها الموضوعي والمنطقي ومنها الطريف ومنها المضحك المضحك الذي يجبركم على الضحك حتى تبان نواجزكم والغريب الذي يجبركم على رفع حاجب الدهشة .
أولى المتفاعلات قالت في معرض ردها على الإستنجاد بها وكأنما الأمر مؤكداً لديها قائلة لها :(جيبي فخار الزير واعركي لي ليهو مكانه لما تكب الدم)
بعدها مباشرة جاء رد أحد المشاركين مستنكراً هذا الرأي مكتفياً بكلمتين فقط قائلاً لها مستفهماً
(لي اصلوا إعدام؟)
محمد حمزة احمد عبدالله جاء برأي أقرب للمنطق لأنه يريد أن يرسل لها علاجاً أستعمله أبناءه وبالطبع هو رأي قد لايتفق معه فيه الأطباء لأن تشخيص ووصف أي علاج يجب فيه مراجعة الطبيب الذي يصف علاجه حسب التشخيص – قال محمد حمزة في رسالته: ( انا قبل كده حصل نفس الشى لاولادى حلقو فى صابرين بحاول ارسل ليك علاج كتبتو لى استشاريه سودانيه فى السعودية)
وتوالت التعليقات الطريفة بعض الشئ من عضو يدعى عمر محمد قائلاً:(ياريت ترسلو لي انا برضو بعاني من نفس المشكلة بي سبب أني حلقت في السودان قبل كده )
وتقفذ عبر الصفحة وصفات ووصفات يسيطر فيها الإعتماد على العلاج البلدي حيزاً كبيراً ،قالت فيه ناهد بابكر
(المر الحجازي)
فيما ورد الرأي الذي يعتبر هو التصرف السليم من قبل المشاركة تنزيل حيدر التي قالت متفاعلة ومقسمة بالله :
(امشي وديه اخصائي جلديه بلاي بلا عسل بلا بتاع واقسم بالله تمش تعمل ليه حاجه غلط يقوم راسو ويتلهب)
وشاركتها الرأي حنان بشير مكتفية بالقول (ايوه كلامك صح)
فيما بادلتها تنزيل الود قائلة لها 🙁 تسلمي حبيبه)
ولعل لنور الزمان وصفة أخرى لأم الطفل المنكوبة قالت لها نور (عليكي بنبات الصبار)
فيما إنتقدت حنان بشير تلك الآراء قائلة لهم (والله انا مستغربه الناس البتفتي وتقول اعمل ليه كده وامشي صيدلية وامسح ايه ما بعرف. هي قالت جربت كل شي ما نفع. ما تضيعي وقتك وقروشك وامشي لي أخصائي جلدية وبس)
ولعل الدعوات الصادقات لم تبارح دردشات قروب الوصافين الذي يرد به يوميا وعلى رأس كل ساعة قصص وحكايا يندى لها الجبين دهشة ، فكانت الدعوات حاضرة بدعوة المشارك نورالدائم ادم قال مكتفياً (ربنا يديه العافيه)
كذلك ترجى محمد على صاحبة الوجعة قائلاً :(الدكتوووور الله يرضى عليك)
ودخل على خط المشاركات وصافه من نوع آخر يبدو أنها جابت أرجاء المعمورة كلها تدعى ثناء حسان وصفت قائلة:(امشي جنب مكه للعيون سليمان الخليفه اختصاصي جلديه شاطر دي حساسيه كانت عند امي مشينا ليهو قبل ثلاثه ايام ماشاءالله كأنو ماكانت في يدينا مراهم وحبوب)
وعادت أو عاد نور الزمان برسالة أخرى بالقول 🙁 والله حصلت لاخوي بس عندنا نبات صبار امي كانت بتمسح ليه منه أختفى) وأضاف/ت نور الزمان (وبالمناسبه خصصوا ليه مخدة لانه بمسك الجميع)
فيما فجرالعبيدالطاهر عكدابي مفاجأة من العيار الثقيل حسب وصفه قائلاً لها : (امسحو بي طينة من حفير الشيخ المكاشفي ان شاء الله ربنا يشفيه)
بعدها دوت ضحكة مجلجله من محمد عبدالقادر ،على حديث عكدابي ضحكة كادت أن تخرج جميع الدردشات بالمجموعة خارجاً وبالطبع لو كان مارك مؤسس الفيس بوك يفهم قليل من العامية السودانية لـ(حفزه )على تلك المشاركة الرائعة ،بدأ محمد مشاركته بـ( ههههههه يازول ياخ اتقي ربك ياخ بلا حفير المكاشفي بلا لعب معاك)
بعدها رد عليه العبيد الطاهر عكدابي مغتاظاً قائلاً له ( أمال متقيك انت)
أما ميتو إسماعيل إكتفت بالقول في مشاركتها التي جاءت طريفة جدا إستنكرت دهشت الجميع –لاحقا- بالقول (تمشي الصيدليه البيطريه ) وتابعت ماتندهشي اي البيطريه مبينة قولها (لانو دا مرض مشترك بين الانسان والحيوان بس البعملوهو للحيوان فعال وسريع اكتر)
أما هاجر فقالت: ( دي فطريات محتاجة علاج من دكتور البلدي ما بعالجها.. وكمان خطورته انو معدي شديد)
وكان لثعلب الصحراء رأي آخر بالقول :(العجين المر ي زول بدري صباح ومساء لمدة اسبووع حرم يقوم حامد شاااكر@)
ولفتحي أكرم وصفه أخرى قائلاً ( شامبو كيتوكنازول)
وتنهد جمال علي الصعداء ختاماً قائلاً :(يازول خليهو كدا ساي انا برضو كان جاني في راسي دي فطريات ساي يامشي لي دكتور ياخلي ساي براهو بيمش ماتسمع كلام الناس ساي)
سعيد يوسف سعيد
الخرطوم(كوش نيوز)